Mizoramah tangkhang 75 la awm

Covid-19 vanga state dang leh ramdang mi Mizorama tangkhang thawn haw tur mi 75 an la awm. Mizoram mi state páwna tangkhang, June 1, 2020 thlenga rawn haw thleng tawh zat chu mi 12,415 an ni.

Task group on Migrant Workers & Stranded Travellers chhinchhiah danin, tangkhang thawn haw turte hi Canada leh USA mi pakhat ve ve, Myanmar mi 47, Madhya Pradesh-ah pakhat, Odisha mi pali leh Manipur mi 21 an ni. July 1, Nilaini thlenga chhinchhiah danin, Task Group hnena Mizorama rawn haw tura inziak lut tawh zat chu 14,401 an ni a, rawn haw thleng tawh zat chu 12,415 an ni. Kawng laka thang mek mi 90 awmin, la haw tur chhinchhiah zat chu 1,986 an ni. Rawn haw tawh zinga mi 748-te quarantine facility-ah an la awm mek a, mi 11,667-te'n khung hran hun hmang zoin an chhuak tawh thung.

Tangkhang rawn haw tawh zat hi Task Group leh DC-te'n quarantine an chhinchhiah a inang lo a; a chhan chu - Task Group chuan tangkhang rawn haw, official-a inhriattirte chauh an chhin­chhiah laiin, DC-te chuan khung hran tawh zawng zawng, haw tura inhriattir leh inhriattir lote pawh an chhinchhiah vek vang a nih thu, sorkar thuchhuah chuan a tarlang.