Ramri chungchang ZPM ṭhalaiin DC sawipui

Zoram Peoples' Movement (ZPM) Ṭhalai hruaitute chuan an president Malsawmzuala hoin nimin khan Vairengte dái auto-rickshaw stand bula Assam lamin dan loa dâwr tur an sakna hmun tlawh tumin an kal a; Kolasib DC Dr H Lalthlangliana nen an inkawm hnuah, DC ngenna angin an kal lui lo.

ZPM Ṭhalai hruaitute leh ZPM Kolasib Block hruaitute chuan, Mizoram lamin Assam leh Mizoram inrina reserved forest area-ah kutthlak loh (status quo) ṭha taka an kenkawh laia Assam lamin bawhchhiaa hma an la fo chu an duh loh thu Kolasib DC an hrilh. Kolasib DC chuan, Vairengte dái auto-rickshaw stand bula Assam lamin dâwr an siam leh a bul hnaia inbéngbel an awm chu ngun takin an ngaihven reng nia a sawi rualin, Covid-19 vangin hmalak chak a har niin a sawi a; sorkar hmalak tum dante sawiin, ZPM Ṭhalaite chu ramri tlawh rih lo turin a ngen a ni.

ZPM Ṭhalai president Malsawm­zuala chuan, "February 28, 2020 khan auto-rickshaw stand bula dan loa in leh lo dinte a hmunah kan tlawh tawh a, Mizoram sorkar pawh hma la thuai turin kan ngen tawh. Mahse, ramri humhalh turin Mizoram sorkar hmalakna tun thlengin hmuh tur a awm lo a, a pawi kan ti hle. Tun hnaiah a hmun ngaiah bawk Assam lam aṭanga dawr siam a ni ta hial hi Mizoram mipui an thamlohna lian tak a ni a, MNF sorkar tan mualphona tàwp a ni," a ti.

Malsawmzuala chuan, MNF chu opposition an nih laiin an hruaitute ramri vei ber angin an awm a, an MLA-te pawh ramrî-ah vawi tam an kal tih sawiin, "Kan Rajya Sabha MP thar tur ngei pawh MLA inthlan dawnah ramri venhim huamin silai pe khawm turin Zoram mipui a ngen hial a ni," a ti a; MNF party-te chu MLA leh MP tlinna atan chauh ramri an vei em ni, tiin a zawt a ni.