KHAWTHLIR

Ram inhlan
Food Corporation of India (FCI) kudam lian sakna atan Food, Civil Supplies & Consumer Affairs department chuan nimin khan Sairang Dinthara an ram chu FCI hotute hnenah an hlan. Ram hi kum 99 chhung atan an inhlan a; FCI-in kudam lian a sak tur hi buhfai metric ton 10,000 leng tura ruahman a ni.

Inbuatsaih tan
Mizoram Youth Commission (MYC) hnuaia sipai lak rûnpui atana inbuatsaihna chu nimin khan ṭan a ni a; Aizawl, Champhai leh Serchhipah Pre-Army Recriutment Rally medical screening kalpui ṭan a ni. Kar lehah Siaha, Mamit leh Lawngtlaiahte inbuatsaihna hi ṭan leh tum a ni.

Bazar hawng
Vairengte Bazar building sak thar chu nimin khan Rural Development minister R Lalzirliana'n a hawng. R Lalzirliana chuan, Vairengte mipuite chu Mizoram luhkapui an nih angin, kawng hrang hranga Mizote aiawhtu an nih thu a sawi. Bazar building hawn tâk hi NLCPR aṭanga sum hmuh nuai 387.56 sénga sak a ni a; square metre 1,429.24-a zau niin, inthiarna, canteen, garbage shed leh conference hall a awm.

Ṭanpuina sem
Chief Minister’s Rural Housing Scheme (CMRHS) hnuaia in sak ṭanpuina, Lunglei East bial chhunga dawng tura thlante hnenah nimin khan BNRGSK Hall, Dâwn khuaah bialtu MLA Joseph Lalhimpuia'n a sem. Ṭanpuina hi Dâwn khuaa chhungkaw panga, Rálvàwng khuaa chhungkaw panga leh Hlûmte khuaa chhungkaw pahnih hnenah Rs. 50,000 ṭheuh pek a ni.

Lei chimin delh
Nimin chawhnu dár 2 vel khan Lalbiaksanga (30) s/o H Ropuia, North Ṭinghmun (Bawngkawna khawsa mek) chu Chaltlang, Aizawla ban khur tur a laihnaah a chhak lama ko chimin a delh hlum. A ruang hi chawhnu dar 2:20 vêlah lak chhuah a ni.