Garduate zat tam aiin mithiam chhawrtlak Tam belh a pawimawh zawk - Chief Minister

Kolasib-a C Zakhuma Higher Secondary School chuan nimin khan sorkar sikul puitlinga hlankai an nih an lawm a; khuallian, chief minister Lal Thanhawla chuan, graduate zat tam aiin, mithiam chhawrtlak tam belh a pawimawh zawk thu a sawi.

Chief Minister chuan, India ram pum huap competitive exam chi hrang hranga Mizo an thleng sang tâwk lo ṭhin chu hmasawn ṭulna lai tak a nih thu sawiin, "Graduate zat tam lam aiin, mithiam chhawr tlak leh mi ṭangkai tam belh a pawimawh zawk. Ṭhahnemngaihna leh tumruhna neih a pawimawh a, exposure neih tam a, hnam dangte ningkhâwng hriatte hi rilru tizautu leh ngaihtuahna ṭha zawk siamtu a ni thei," a ti.

India ram chu khawvela ṭhalai ngah ber a nih mek thu sawiin CM Hawla chuan, "Rei lo têah khawvel ram dang zawng aiin kan ṭhalaite hi kawng eng­kimah, ram rorelna thlengin an pawimawh dawn a ni," a ti a; zirlaite chu ram in­nghahna tlak nih ngei tum a, an zirlaiah ṭhahnemngai taka bei ṭhin turin a chah.

C Zakhuma HSS hi kum 1999-ah khawtlanga mi ṭhahnemngaite hmalaknaa din a ni a, a din tirh chuan Kolasib Morning College tih niin, a hnuah donor hming chawiin C Zakhuma College tih a ni. Kolasib-ah HSS mamawhna a tam avang leh Kolasib College a awm tho avangin HSS-ah thlak leh a ni.