Mamit district-ah HIV+ve a pung
Mizoram State AIDS Control Society (MSACS) leh an thawpui Project Sunrise leh North East Technical Support Unit (NETSU)-te chuan Mizoram khawthlang lama HIV pung chho mek chungchanga hmalak dan tur enfiahin nimin khan Mamit district-a khaw hrang hrang an fang.
Mamit OST Centre-ah HIV/AIDS donaa thawktu hrang hrangte nen an inkâwm a; Project Sunrise coordinator Robert Lalrempuia Khiangte, NETSU hotu te, NACO aiawh Alan Lalmuanpuia, Link Worker Kolasib & Mamit district resource person Freddy Lalramgheta ten an ho a ni.
Inkawmhonaah hian, Mamit district-a HIV hluar zel vanga tihhniam a nih theih nan ruihhlo (drugs)-a inchiu ṭhinte'n inchiu bànsana damdawia enkawlna him an dawn theih nan Oral Substitution Treatment (OST) hmun tam zawka sem theih dan tur an ngaihtuah a; Mamit, Kawrthah, Zamuang leh Zawlnuamahte OST lak theih dan tur an enfiah nghal.
Tun hnai kum hnih/khat kal ta vel aṭangin Mamit district-ah Tripura ramri hnaih lama awmte zingah ruihhlo a hluar hlea hriat a ni a; ruihhlo hluarin HIV hrik pai a tihpun loh nan MSACS leh an thawhpuite chuan hmalak dan tur an ngaihven a ni.
MSACS, Project Sunrise leh NETSU aiawhte hian vawiin hian Zamuang leh Zawlnuam bakah, a chhehvel khuaa mite tana OST pek chhuah theih dan tur an ruahman dawn a ni.
Mamit district leh HIV
Khua Client HIV+ve OST la zat
Mamit 112 13 44
Zawlnuam 86 30 67
Kawrthah 64 8 46
Zamuang 52 3 45
Bungṭhuam 39 13 12
Rengdil 17 - 6
Tuidam 13 1 -