Group A&B-te'n hlawh an la la lo ; A hun taka hlawh pe turin CM ngen

Mizoram sorkar chuan a hnuaia thawkte zinga group A leh B-te December 2022 thla hlawh a la pe lo. Federation of Mizoram Government Employees and Workers (FMGEW) chuan a hun taka hlawh pe ṭhin turin January 7, 2022 khan chief minister Zoramthanga an ngen.

Sorkar officer-te hnen aṭanga thu dawn danin, Mizoram sorkar hnathawk group A leh B-te chuan nikum December thla hlawh an la la lo a; nikum kum chanve vel aṭang khan hlawh lâk hun pangngaiah hlawh an la ngai tawh lo a ni.

FMGEW chuan January 7, 2022 khan CM Zoramthanga hnenah lehkha thehlutin, a hun taka hlawh pe ṭhin turin an ngen a, "Sorkar hnathawkte hi loan chi hrang hrang la kan ni hlawm a, hlawh kan lak tlai hian a hun takah loan kan rùl thei ṭhin lo a, penalty tam tak kan chawi tawh a ni. Chu bakah, kan hlawh ringa khawsa ve ṭâwk ṭâwk kan nih hlawm avangin chungkaw khawsak nasa takin a buai ṭhin. Chuvangin, kan hlawh hi a hun taka kan lâk ṭhin theih nan hma min laksak turin kan ngen nawn leh che a ni," an ti.

February 2021 khan Supreme Court-in sorkar hnathawkte chu a hun taka hlawh pek ṭhin tur an nih thu sawiin FMGEW chuan, "Pek tlai an nih chuan interest (a pung) nena pek tur an ni tiin judgement a lo siam tawh a ni," an ti a; chutih laiin, Mizoramah chuan hun eng emaw chen aṭang khan Mizoram sorkarin a hnathawkte hlawh a hun takah a pek ngai loh thu an tarlang.

Dearness allowance (DA) tihpun dilna pawh ziakin vawi thum an thlen tawh tih tarlangin FMGEW chuan, "Tun thlengin tihhlawhtlin a la ni lo a, DA pung hi kan nghakhlel tawh hle a ni," an ti a; pay rules anga DA tihpunsak thuai turin CM an ngen.

FMGEW tarlan danin, Mizoram sorkar hnathawkte pay rules ang chuan, DA rate chu sorkar laipui hnathawkte rate ang zela pek tur a ni a; sorkar laipui hnuaia thawkte DA chu July 1, 2021 aṭangin 31% pek an nih tawh bakah, January 2022 aṭangin 3% vela tihpun leh mai tur a ni. Mizoram sorkar hnathawkte erawh chu 17% chiah pek an la ni thung.

Pension hamṭhatna chung-changah FMGEW chuan Mizoram sorkar hnathawk chàwl tawhte'n hun eng emaw chen aṭangin pension hamṭhatna an hmuh tur an hmu thei lo tih tarlangin, "Thla tin hlawh an neih tawh loh avangin pensioner-ten harsatna an tâwk nasain an khawngaihthlak hle," an ti a; pensioner-te'n an chanvo hamṭhatna an hmuh thuai theih nan hma la turin CM an ngen a ni.

Sorkar hnathawkte thu leh hla
• Kum 2021 kum chanve vel aṭang khan hlawh lâk hun pangngaiah hlawh an la ngai tawh lo
• Loan chi hrang hrang la an ni a, a hun takah loan an rùl thei ṭhin lo a, penalty tam tak an chawi tawh
• Hlawh ringa khawsa an nih avangin chhungkaw khawsak nasa takin a tibuai
• Supreme Court-in sorkar hnathawkte hlawh pek tlai an nih chuan interest (a pung) nena pek tur an ni a ti
• Dearness allowance (DA) tihpun dilna pawh ziakin vawi thum an thlen tawh a, a la hlawhtling lo
• Pensioner-te'n hun eng emaw chen aṭangin pension hamṭhatna an hmuh tur an hmu thei lo