CYMA-in kuhva tawlh ngawihsan tum lo ; Zir chiangtute report an ngaichâng mek

Central YMA chuan, dan loa ram páwn aṭanga Mizoram kaltlanga kuhva rah tawlh chungchang chu ngawihbosan an tum lo a, zir chiang tura an ruatte report an ngaichâng mek.

Vanglaini palai zawhna chhangin CYMA vice president Lalhmachhuana chuan, kuhva rah hmanga sumdawnna chu ngawihsan mai an tum loh thu a sawi a, "Zir chiangtu tur committee kan dinte'n report an rawn la thehlut lo a, kan la ngaichang mek," a ti.

CYMA Vice President sawi danin, zir chianna report an dawn hunah CYMA chuan report behchhanin a ṭul anga hmalak zel dan tur chu a rêl dawn a ni.

Tarlan tawh angin, December 29, 2021-a YMA Central Executive Committee ṭhukhawm chuan kuhva rah hmanga sumdawnna chungchanga Champhai DC Maria CT Zuali hmalakna an thlâwp thu an puang a; kuhva rah hmanga sumdawnna chu zir chiang turin committee an din nghal.

YMA CEC chuan, kuhva rah tawlh chungchang ngaihtuahin, "Dan loa sumdawnna titàwp tura Champhai bawrhsap Pi Maria CT Zuali hmalakna hi CYMA chuan a thláwp tlat a. Dan loa sumdawnna kalpui mek hi tihtawp thuai a nih theih nan thuneitute ṭangruala hma la thuai turin kan ngen a ni," an ti.

Central YMA chuan, "Mizo hnam nun dan ṭha tichhe theitu leh tichhe mektu he sumdawnna hi tihtawp a nih theih nan hmalak chhunzawm zel remtih a ni," an ti a; dan loa sumdawnna kalpui mekah YMA hruaitu leh member-te chu inhnamhnawih lo turin an ngen a ni.