Aizawlah dâwr inhawn chhâwk dawn

January 8, Inrinni khan Aizawl DC Dr Lalhriatzuali Ralte kaihhruaiin Aizawl SP conference room-ah sorkar leh pâwl hrang hrang hruaitute'n Covid-19 inkaihhruaina thar an sawiho a; kohhran tinin CAB/SOP Implementation Committee din ngai pawimawh se an duh thu an sawi. Bawrhsap chuan Inrinni tlai khan Aizawl khawpuia dawr inhawn chhâwk dan tur a tichhuak nghal.

Dr Lalhriatzuali Ralte chuan, Covid-19 laka himna tura sorkarin inkaihhruaina a siamte chu ngaih pawimawh thar a ṭul thu leh khauh taka kalpui a ṭul thu sawiin, "Mipui tana harsatna thlen zawnga ruahmanna siam hi kan duh ber a ni lo a, mahse, kan him tlàn nan siam a ngai fo ṭhin," a ti a, hrethiam turin mipui a ngen.

Ṭhutkhawmah hian Traffic SP Rodingliana Chawngthu, Aizawl DC office-a officer te, Aizawl East leh West chief medical officer, MKHC, All NGO Coordination Committee leh Aizawl City Local Councils’ Association hruaitute leh sumdawng pawl MIMA leh MBCC aiawhte an tel.

Aizawl DC chuan January 8 tlai khan thupek chhuahin, Aizawla dawr inhawn chhâwk dan tur a puang a; dawr inhawn chhâwk dan tur ruahmanna chu January 31, 2022 thleng hman tura tih a ni. Inrinni-ah dawr zawng zawng hawn phal a ni a, damdawi dawrte chu ni tin hawn phal a ni. Bazar leh dawr inhawn theih hun hian curfew (zan dar 9 - zing dar 4) chhung a huam lo a, khaw thim hnuah rei tak dawr hawn phal a ni lo.

Dawr inhawn chhâwk dan tur
Group-A: Thawhṭanni-ah an inkhâr ang
1. Thawmhnaw, pheikhawk dawr.
2. Secondhand dawr.
3. Puan, puanthân leh la zawrhna.
4. Puanṭhuina leh a kaihhnawih dawr.
5. Pangpar zawrhna.
6. Group ṭhennaa lang ve lo dawr dang zawng.

Group-B: Thawhlehni-ah an inkhâr ang
1. Computer, mobile phone, electronic appliance dawr leh a chhe siamna.
2. Printing, photocopy, adt. dawr.
3. Stationery leh lehkhabu dawr.
4. Dispo material (dispo cups/plates, adt.) dawr.
5. Arms & ammunition dawr.

Group-C: Nilaini-ah an inkhâr ang
1. Hardware/in sakna bungraw chi hrang hrang zawrhna dawr.
2. Autoworks/spare part dawr.
3. Khawl/machinery dawr leh a chhe siamna.
4. Tarmit dawr.
5. Goldsmith, jewellery dawr.

Group-D: Ningani-ah an inkhâr ang
1. Furniture dawr.
2. Sports bungraw zawrhna.
3. Sana zawrhna leh siamna dawr.
4. Miniso/Vishal/Mart, adt. leh mall.
5. Network marketing dawr.

Group-E: Zirtawpni-ah an inkhâr ang
1. Naupang lawm (toys), cycle dawr.
2. Naute mamawh zawrhna dawr.
3. Bungbel leh eirawngbawlna hmanraw zawrhna.
4. Cosmetics/make-up dawr.
5. Nihliap/pheikhawk/bag chhe siamna dawr.