Airport-a Covid-19 screening point Health minister Thangtea'n a enfiah

Health & Family Welfare minister Dr R Lalthangliana chuan January 8, Inrinni khan Lengpui Airport-a Covid-19 screening point a tlawh a, thlawhtheihna hmanga khualzin lutte dawnsawn dan tur leh buaipui dan tur ruahmannate a en.

Health Minister ho hian airport chhâwng khatnaa khualzin náwlpui swab sample endikna hmun (booth)-te endik a ni a, positive dah hranna tura ruahman sa pawh mumal leh felfai zawka kalpui dan tur siam a ni.

Thawktu indaih lohna phuhrûk dan tur pawh sawiho a ni a, khualzin thleng zinga hripui vei hmuh chhuahte phurh chhuah dan tur leh an inenkawl zui dan turte sawiho a ni bawk.

Paramilitary force zinga hripui vei hmuh chhuahte chu an hotute'n an ngaihsak tâwk loh thu leh zan lam thlenga hruai loha an awm ṭhin thu tarlan a ni a; airport venhimna thlenga nghawng thei a nih avangin Home department hotute chuan a ṭul angin hma an lak nghal dawn thu an sawi.

Sorkar thuchhuah tarlan danin, Lengpui Airport-a ni khata thlawhtheihna rawn ṭum a tam leh tawh avangin khualzin thlengte swab sample endik chu awlsam leh hun heh lo zawka kalpui theih dan tur ruahman a ni a; Airport ground floor-ah thlawhtheihna thleng hmasaa chuangte sample endik chhunga thlawhtheihna danga lo thlengte'n harsatna nei loa an ṭhut hahdamna tur te, kum upa/tar chak lo leh damlo wheelchair-a nawr ngaite sample endikna tur bik special booth leh positive an awma dah hranna tur isolation tent ruahman a ni.

Dr R Lalthangliana chuan, khawvel leh India ramah Covid-19 hrik thar Omicron a léng mek tih sawiin, "Ram hrang hrangah leh India state hrang hrangah inkhuahkhirhna leh inkaihhruaina thar an hmang leh tawh. Mizoramah pawh mithiamte ráwn chungin sorkarin Mizoram páwn aṭanga lo lutte endik dan tur leh dawnsawn dan tur ruahmanna a siam thar a, awmze nei leh mumal taka kan inpuahchah a pawimawh," a ti.

Lengpui Airport chu luhka pawimawh a nih thu sawiin Minister chuan, "A bik takin India ram páwn aṭanga rawn hawte leh ṭhenawm hnaivai state tih loh India ram hmun dang aṭanga rawn luhna hmun a nih avangin uluk taka kan vil a ṭul," a ti a; airport chei ṭhat hna kal lai mel tiṭhuanawp si loa hmalak a ngaih thu a sawi.

Health Minister hi Health secretary R Lalramnghaka, principal director Dr F Lallianhlira, DMR additional secretary Vanlalmawia bakah, Aizawl DC leh sorkar hotu dangte leh Lengpui VC leh task force hruaitute'n an ṭawiawm a ni.