NH-54 kawngpui siam mek enfiah

National Highway (NH) no. 54 kawng zauh leh siam hna thawh mek chu Lunglei DC Kulothungan A kaihhruaiin January 8, Inrinni khan Lungleia sorkar hotute leh khawtlang hruaitute'n an enfiah.

NHIDCL hnuaia Lunglei district-a NH-54 siam hna thawktu contractor chu ABCI Infrastructure an ni a; kawng laihna leivûng an paih dan te, khawtlang leh mimal aṭanga complaint lut te, an hmanrua leh lung hman dinhmunte an enfiah a ni. Contractor-te hmanraw hman chu PWD-in a hranpain an endik (quality test) dawn a ni.

Lunglei DC chuan, complaint lutte a rang thei ang bera bawhzui zel a nih tur thu a sawi a; ROW (right of way) chhunga land filling tih nasat ngaihna hmunahte leivûngin a thlang lui/kawrte a tihchhiat lohna atan land filling tih hmaa toe-wall siam vek tawh tura contractor hrilhin, "Ram hmasawnna atana thawk vek kan nih avangin kawng ṭha kan neih vat theihna turin theihtawpa mipui leh a thawktute kan ṭanrual a ngai," a ti.

Kawng siam mek ennaah hian Lungleia LRS settlement officer, PWD hotu te, Hnahthial SDO, Lunglei Ṭhalai Pawl hruaitu te, NHIDCL General Manager bakah, Dawn, Zobawk, Lungpuizawl leh Hrangchalkawn VC-te an tel a; NH-54 paltlang khaw danga hnathawhte chu hun dangah huhoa en leh an tum a ni.