Saihapui-V Mizote huana kuhvate Assam police-in khawih an phal lo

Saihaipui-V khuaa Mizo pathum - Vanlalhruaia, F Malsawma leh Vanrammawia te chu Assam police-te'n an huana kuhvate khawih an phal lo. Mi pathumte huanah hian Assam police-te an inkulh mek a ni.

Vanglaini thu dawn danin, kum 2021-a ramria buaina a awm khan Assam police-te chu Saihapui-V khaw mi pathumte huanah an inkulh a, tun thlengin an la inkulh. Ram neitute chu Assam police-te chuan an kuhva khawih an phal loh laiin, hnam dangte erawh chu an lawhtir ṭhin thung.

Saihapui-V leh a chhehvelah buaina a awm lo a, Mizo pathumte tih loh mi dangte chu an huanah kalin an thlai tharte an la thei a ni.

Hetih lai hian, Aitlang, Vairengte lamah chuan hmunphiah keh a hun ṭan dawn a, Assam police-in an ven china Mizo huan neite'n an hmunphiahte an keh theih dawn leh dawn loh hriat a la ni lo.

Hmunphiah neitute chuan venhimna hnuaiah an hmunphiahte ṭha taka lak an duh thu sawiin, "Sorkarin hma min lakpui se, buaina awm loa lak theih ngei kan beisei a ni," an ti.