KHAWTHLIR

Thisen pe
KṬP, Electric Veng Pastor Bial chuan Inrinni khan Electric Veng Kohhran jubilee hall-ah thisen pek huaihawtin, Synod Hospital tan thisen unit 48 an pe a, petute mipa 40 leh hmeichhia pariat an ni.

Hmun khâr rih
Phulpui Branch YMA chuan Covid-19 inkaihhruaina tharah public park-a lên chhuah phal a nih loh avangin an khaw tlang, Zawlpala Thlàntlang chu vawiin aṭangin thu leh awm hma chhuan khàr rih a ni dawn a, tlawh theih a nih rih dawn loh thu an tarlang. Sialsuk Village Task Force pawhin vawiin aṭangin Sialsuk tláng tlawh phal a nih rih loh thu an puang a; Lungleng-I Village Task Force chuan Lungleng lal-in chu vawiin aṭangin khàr rih a ni dawn a, tlawh phal a ni lo tih an tarlang bawk.

In kâng ral
Nimin chawhma dar 11:30 vel khan Champhai Zotlanga Biaknghinglova in, Assam type, Lalrothara luah lai chu a kâng a, bungrua chuh hman lohin a kâng ral. Thu dawn danin, kângmei chhuah ṭan laiin in luahtute an awm lo a, in kan chhan hriat a ni lo.

Chanchinbu semte'n hruaitu an thlang
Mizoram Chanchinbu Sem pawl chuan kum 2022-2024 chhunga an hruaitu turte an thlang a, president-ah PB Shiana, vice president-ah SC Dosanga, general secretary-ah PC Lallawmsanga, assistant secretary-ah Lalfakawma, treasurer-ah Lalnguri leh finance secretary-ah Lalhuzauva te an thlang. Chanchinbu sem pawlte chuan, December thla an sem kim lo chunga Vanglaini editor K Sapdanga ten thla pum sem anga hlawh an pe chu an lawm thu an tarlang.

Restricted area
Covid-19 darh zau zel tur ven nan January 8, Inrinni khan Serchhip DC Kumar Abhishek chuan Lungpho khua chu hmun khuahkhirh bik (restricted area)-ah a puang. Khawzawl DC CC Lalchhuangkima pawhin Lungtan khua chu restricted area-ah a puang bawk. January 2022 chhungin Serchhip DC hian East Lungdar, Chhingchhip Venglai leh Chhingchhip Venghlunte chu restricted area-ah a lo puang tawh a ni.