Covid-19 vei hmuh thar ni tin a pung zel

Mizoramah Covid-19 vei January 7, Zirtawpni khan mi 852 leh January 8, Inrinni khan mi 903 hmuh chhuah a ni a, ni hnih chhungin mi 1,755 hmuh niin, kuminah ni tin a pung. Nimin leh Inrinni khan hripui vei dam tawh mi 422 chhuahtir an ni a, mi pali an thi.

Covid-19 vei January 7-a hmuh chhuah mi 852-te chu ZMC-a hmuh 31, TrueNAT hmangin 29, RAT hmangin 787 leh FIA hmangin panga an ni a; mipa 382 leh meichhia 470 niin, symptom nei 617 leh nei lo 235 an ni.

Inrinnia hmuh chhuah 903-te chu ZMC-a hmuh 75, TrueNAT hmanga hmuh 21, RAT hmanga hmuh 800 leh FIA hmanga hmuh pasarih an ni. Mipa 413 leh hmeichhia 490 an ni a, symptom nei 644 an awm laiin, mi 259 chu symptom nei lo an ni thung.

January 7-a Covid-19 vei hmuh chhuah tam zualna khuate chu - Bungtlangah 99, Lungtianah 43, Thenzawlah 34, Lungpho-ah 29, Dilkawnah 27, East Lungdarah 22, Sangau-ah 20, Sailulak leh Dárlâkah 18 ve ve, Rúlchàwmah 19 leh Rabungah 15-te a ni.

Inrinnia hripui vei hmuh tam zualnate chu - Lungtanah 118, Bungtlangah 42, Sangau-ah 37, Baktawngah 34, North Serzawlah 32, Hualtu-ah 28, Hmunṭhaah 27, Sekhumah 24, Thénhlûmah 22, Darlungah leh Sailulâkah 21 ve ve, Thenzawlah leh Darlâkah 20 ve ve, Sihphirah 19, Mualphengah 17 leh Chhingchhipah 16 a ni a, a tam berin symptom an nei.

Nimin tlai dar 5 thleng khan hripui vei dam tawh mi 270 chhuahtir an ni a; Inrinni khan mi 152 chhuahtir an ni bawk.

IDSP record angin, Mizoramah Covid-19 vei 1,45,527 hmuh chhuah a ni tawh a, mipa 69,960 leh hmeichhia 75,567 an ni. Nimin tlai dar 5 thleng khan mi 1,40,872 (96.80%) chhuahtir an ni tawh a, mi 561 (0.39%) thi tawhin, enkawl mek mi 4,095 (2.81%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,45,527 chu mi 1,000 zelah hripui vei mi 132 an awm ang a ni a; mi 1,00,000 zela Covid-19 vangin mi 50 an thi tawh ang a ni tih sorkar thuchhuakin a tarlang.