Aitlang leh Saihapui V-a hnathawktute Thlavâng hauh turin sorkar phût

ZPM Ṭhalai chuan, Vairengte Aitlang leh Saihapui-V khuaa kut hnathawktute thlavâng hauh turin Mizoram sorkar an phût.

ZPM ṭhalaite chuan thuchhuah siamin, hmunphiah seng a hun ṭan laiin, Aitlánga hmunphiah hmun neitu Mizote nasa taka Assam police-te’n an nèksàwr avangin an mangang hle tih an tarlang a, “Aitlangah hian Mizote hmunphiah hmun tam tak chu Assam police-te’n luahsakin, Mizoram sorkarin hmunphiah huan neitute hnenah hian venhimna a pêk loh a, hma a lâkpui loh chuan an hmunphiah tharte an seng ngam a rinawm loh a ni,” an ti.

Saihapui-V khuaah pawh kuhva huan neitu Mizote chu Assam police-te’n lawh an phal lo a, Mizo huana kuhvate chu Assam police-te’n an mi leh sate ruaiin an lo ṭhin niin an tarlang.

ZPM Ṭhalai chuan, “Kan ram chhung ngeia thlai tharte enkawl ngam lo leh seng ngam loa kan awm ta mai hi ‘Pathian leh kan ram tan’ titu MNF sorkar hian engtikah nge a ngaih thutak ve ang? Ramria huan leh thlai neite thlavâng hauh kawngah chak taka hma la turin MNF kaihhruai Mizoram sorkar kan ngen a ni,” an ti.