Covid-19 vangin mi 561 thi tawh

Nimin khan tlai dar 5 thlengin Covid-19 vangin mi pathum an thi a, January 8, Inrinni khan mi pakhat leh January 7, Zirtawpni zanah mi pakhat an thi bawk. Mizoramah hripui vangin mi 561 an thi tawh a, tun January thla bikah mi 15 an thi tawh.

Lalchhuanawma (51), Khawzawl Vengthar chu January 7 zing dar 8:50 khan hripui vangin Champhai DCHC-ah a thi a, natna dang nei tel niin, Covid-19 vei a ni tih January 4 khan hmuh a ni. January 7 vêk zan dar 9:10 khan Lalkunga (82), Khawzawl chu State Referral Hospital-ah a thi a; hripui vei a ni tih December 27, 2021 khan hmuh niin, January 4 khan SRH-ah dah luh a ni a, natna dang nei tel a ni.

January 8, Inrinni chawhnu dar 1:30 khan Zochhuana (39), Chaltlang Lily Veng chu SRH-ah a thi a; Covid-19 positive a ni tih December 20, 2021 khan hmuh chhuah niin, December 25 aṭangin SRH-ah enkawl a ni a, natna dang nei tel a nih thu sorkar thuchhuakin a tarlang.

Nimin zing dar 6 khan T Donanga (76), Leisenzo, Champhai district chu SRH-ah a thi a, natna dang nei tel niin, Covid-19 vei a ni tih January 6 khan hmuh a ni a, SRH-ah dah nghal a ni. Zirliana (85), Sawleng pawh nimin zing 8:20 khan SRH-ah a thi a; hripui vei a ni tih January 8 khan finfiah niin, a thih hma lawkin SRH-ah dah a ni a, natna dang nei tel a ni.

Nimin zing vêk dar 9:40 khan Chawngawia (70), Tonzang, Myanmar chu SRH-ah a thi a, Covid-19 positive a ni tih December 29, 2021 khan hmuh chhuah niin, SRH-ah dah luh nghal a ni.