NLUP an hêk hneh dawn lo - Chief Minister

Chief minister Lal Thanhawla chuan nimin khan Congress Bhavan-a inkhawmah thu sawiin, "Eng ang pawhin NLUP hêk mah se, Court-ah pawh an hêk hneh dawn chuang lo," a ti.

Eptute'n tih tur an vàn nia sawiin Lal Thanhawla chuan, "Eirukna lama min puhna tur an zawnga an hmu si lo. Party pakhatin mahni hming tilang ngam si loin, mi dang hmingin NLUP an khing a ni. Eng ang pawhin khing se, an khing hneh dawn chuang lo. Guidelines tih velte chu an beisei aia ṭha kan nei," a ti a; NLUP chu an tihtawp dawn loh thu a sawi.

NLUP khin chu tih dan tur a ni em tihte a ngaihtuah ṭhin thu sawiin CM Hawla chuan, "Ram dangah sorkar economic policy khing an awm ang em? NLUP hi baseline ti tur pawhin YMA ngat kan hmang a, YMA ber kan rin tawh loh chuan rin tur an váng âwm," a ti.

Chief Minister chuan, eptu party ṭang­rualte'n sorkar laipuiah an lo hêk tawh thu sawiin, "Sorkar laipui chuan tihtawp a hnêkin Prime Minister phei chuan state dangte pawhin entawn ve se a duh zawk hial a ni," a ti a; eng ang pawhin sawi mah se, NLUP chuan Mizoram a chawi sân zel tur thu a sawi.

Bru chungchang sawiin CM Lal Than­hawla chuan, "Bru-te hi an buaipuiawm khawp mai. Chhuak r'u, kan tih lo mai bakah, chhuak lo turin kan ngen nasa hle. Kei phei chu a hminga Chief Minister ka nih angin chhuak lo tura ngen nasa ber ka ni ang. Tuna an hruaitute hian kha'ng hun lai khan Bru Liberation Army din an tum a, chhuak turin a vaute'n an invau a ni," a ti.

Lal Thanhawla chuan, Mizoram chhuah­santu Bru-te chu an chhuahsan hun laia sorkar laipuia sorkarna changtu BJP-te'n an duhsak hle nia sawiin, Bru-te tlânchhiat hun lai vela Zo hnahthlak Paite leh Kuki-te chu Manipur-ah an intihbuai avangin Mizoramah eng emaw zat an raltlan a, Mizoram sorkarin an lo tuamhlâwm tih a sawi a; Paite leh Kuki ráltlante chu Bru-te anga ṭanpuina pek dil sak ni mah se, sorkar laipuiin an pe duh lo tih a sawi.

CM Lal Thanhawla sawi danin, Bru-te chu an chhuah tûk aṭangin Mizoram sorkarin Mizorama kîr turin a sáwm reng a, an awmna hmunah minister-te pawh kîr tura sawm turin tirh an ni. Chhungkaw eng emaw zat chu an lo let tawh a, lo let tawhte chu ṭha takin Mizoram sorkarin a enkawl a, NLUP-te pawh pek an ni.

Mizorama lêt duh Bru ṭhenkhatte chu Bru pawl hruaitute'n an dang bet a; an hruaitute chuan chhawmdawlna an dawnte chu sumdawnna atan an hmang a, an sumdawnna a tawp an hlauh avangin a kîr duhte pawh Mizoramah an let thei lo a ni.

Chief Minister chuan, Bru lo let leh turte chhawmdawlna sorkar laipuiin pek a tum chu a tam lutuk tih sawiin, "Union Home Minister-in min koh ṭum pawhin ka hnial char char a, lo kir tawhte pek ve an nih loh chuan Bru chhungkuaah pawh buaina a thlen theih thu ka sawi. Rin ang ngeiin Mizoram lo kîr tawh Bru-te'n an phût ve a, kei chuan Mizoram Bru-te hi ka thláwp tlat a ni," a ti.