CM Hawla case-ah Court-ah inlan

Lalhriatrenga Chhang­te, Serchhip-in kum 2013 Assembly inthlan dawnah affidavit dik lo a thehlut a, a thil neih zêp ṭhena chief minister Lal Thanhawla a puhna thubuaiah August 9, Ningani khan Lalhriatrenga Chhangte leh a thuhretu pakhat, Kapliana Pachuau chu Serchhip District Court-ah an inlan.

Thu dawn danin, Lalhriatrenga Chhangte leh a thuhretu Kapliana Pachuau hi Serchhip chief judicial magistrate (CJM) Lalngaihmawia Zote chuan thu a zawh bakah, CM Lal Thanhawla ukil Remsanga Nghaka leh Laithanpuia ten an duh angte an zawt a ni.

Hearing leh hun atan Serchhip CJM chuan September 14, 2018 a ruat a; chutah chuan CM Lal Thanhawla chu Court-ah inlan tura tih a ni a, Court leh Lalhriatrenga ukilte’n an duh angte an zawtfiah ve leh dawn a ni.

Lal Thanhawla ukilte'n Lalhriatrenga chu a u C Lalramzauva’n kum 2003, 2008 leh 2013 inthlana Serchhip biala Lal Thanhawla a hneh loh vanga ûm zui a, a u tana political advantage lak tum a nih leh nih loh an zawt a; Lalhriatrenga chuan, a thubuai theh­luhah political advantage lak tumna a awm loh thu leh case file turin mi thu­ràwn a dawng lo a, ama chhia leh ṭha hriatna hmanga file a nih thu a sawi.

Lalhriatrenga Chhang­te chuan, Kolkata New Town AI-178 hmuna Lal Thanhawla ram chu West Bengal sorkara Addl. District Sub-Registrar, Rajarhat, District North 24-Parganas-a chhiah a pek aṭangin market value Rs. 22,21,92,532 a nih thu leh, chuti zat man ni se, election affidavit-a ziah lan loh chu Election Commission of India (ACI) leh mipui zah lohna nasa tak nia a hriat vanga case file a nih thu a sawi bawk.

Chief Judicial Ma­gistrate-in thu a zawh­fiahnaah Kapliana Pachuau chuan, thubuiai thehluttu Lalhriatrenga Chhangte chu a hriat thu te, hun rei tawh tak aṭangin social media-a Lalhriatrenga thu ziakte a chhiar ṭhin thu te, Lal Thanhawla'n Kolkata-a in hmun a neih thu Lal­hriatrenga’n social me­dia-a a ziah thu te, CM-in Kolkata-a ram a neih chu kum 2013 Assembly inthlan hmaa a neih a nih thu te, ram a neih thu chu Lal Thanhawla'n affidavit-ah a ziah lan loh thute a sawi.