KHAWTHLIR
SSG awareness
Nimin khan Serchhip district-a Hmunṭha khuaah PHE department leh Swachh Bharat Mission (Gramin) buatsaihin thingtlang khawfai inelna, Swachh Survekshan Grameen 2018 awareness campaign neih a ni. SBM(G) Serchhip district coordinator Samuel Lallawmzuala'n Swachh Survekshan Grameen a sawifiah bakah, faina pawimawhzia a sawi.
Thisen pe
J Thankima College NSS chuan nimin khan an college-ah blood donation camp an huaihawt a, Aizawl Civil Hospital tan mipa 67 leh hmeichhia pariatte'n thisen unit 75 an pe.
District thar siam tum lo
PRISM party chuan thuchhuah siamin, PRISM-in Mizoramah sorkarna an siam a nih chuan district thar an siam loh tur thu an tarlang. PRISM hian an party chhinchhiahna (symbol) tur nimin khan an thlang a, an party-in Election Commission of India aṭanga pawmpuina a hmuh an lawmna, August 14, 2018-ah an tlangzarh dawn niin an sawi.
STAM lawm
Science Teachers Association Mizoram (STAM) chuan August 9 khan Aizawlah an din champha vawi 33-na an hmang a; thuchhuah siamin, Mizoram sorkarin Mizoram Institute of Medical Education and Research a din hi lawmawm an tih thu leh duhsakna an hlan thu an tarlang. STAM hi August 9, 1986-a din a ni a, member 492 an awm mek a; science subject-a zirtirtute leh a tui mite STAM member ni turin an sáwm a ni.
Project thlang
Lawngtlai District Level Committee under Mipui Mamawh Intawm Ruahmanna (MiMIR) chu nimin khan DC conference hall-ah an ṭhukhawm a; MiMIR hmanga project siama inelnaa project thehluhte thlirhoin, project ṭha zual 10 an thlang chhuak. Lawngtlai district-ah hian khua/veng 44 aṭangin project a lut a ni.