Ramrî-ah checkgate siam turin sorkar phût

MNF senior vice president Tawnluia chuan, Assam sorkarin National Register of Citizens (NRC) a tihchhuaha tel lote Mizo­rama an lut tur danna turin checkgate siam vat turin Mizoram sorkar a phût.

Nimina Mizo Hnam Rûna inkhawm­ah thu sawiin Tawnluia chuan, NRC vanga Assam-a boruak awm mek chungchangah leh ramri ngaihthahah Mizoram sorkar a puh a, "Ramrî-ah check-tu dah vek rawh se, an lo luh hnu chuan inthliar hran a harsa ang. An lo luh hmaa lo inkhàrkhip nacháng kan hriat a ṭul," a ti.

Tawnluia chuan, Assam-ah boruak lian tak a inmun mek tih sawiin, "Assam ram rîtu state dang zawng zawng an inbuatsaih laia kan la ṭhu der der hi a mak hle," a ti a; MZP-in sorkar kar nana 'Sorkar a inrawlh vat loh chuan keimahniin ramri kan veng mai ang' tia sorkar an nawr a ngai chu vanduaithlak a tih thu a sawi.

MNF-in sorkarna a chan hunah zalenna suala ram múte duhsak hmasak an nih tur thu sawiin Tawnluia chuan, "Zalenna suala ram múte hi MNF hian kan ngaisangin kan chawimawi a; Pathian leh mipui zarah kan sorkar chuan hnam sipai zawng zawng te, martar-te leh an chhungte kan ngai pawimawh hmasa dawn. Ram rohlu an nih tih kan hria a, Socio Economic Development Project (SEDP)-ah pawh ziakin kan dah a ni," a ti.

MNF Senior Vice President chuan, CM Lal Thanhawla'n tun hnaia 'MNF chuan nationalism sawi ngam tur an ni tawh lo, an hralh tawh' tia a sawi chungchangah, "MNF hi Mizo hnam party a ni a, Mizo nationalism hmachhuana ke pên ṭhin kan ni; Mizo nationalism hi kan sawi zel dawn a, kan sawi nasa tulh tulh dawn a ni," a ti a; Congress partgy chu vai pawl an nih avangin Mizo nationalism-ah sawi ve tur an nei ve lo zawk niin a sawi.