Bank-ah cheng vbc. 9902.13 dah lut

State Level Banker’s Committee chuan ni­min khan Secretariat conference hall-ah Finance secretary Sawihlira hoin quarterly meeting an nei a; kum 2017-18 chhungin Mizorama bank hrang hrangah cheng vbc. 9902.13 dah luh a nih thu an tarlang.

Meeting-a tarlan danin, kum 2017-18 chhung khan Mizoramah bank 27-in branch 205 an nei a; bank hrang hranga sum dah luh zat (total deposit) chu cheng vbc. 9902.13 niin, total advances chu cheng vbc. 4580.88 a ni a, credit deposit (CD) ratio chu vbc. 46.26 a ni.

Micro Units Deve­lopment & Refinance Agency (MUDRA) hnuaiah loan mi 11,623 hnenah cheng vbc. 127.07 pek a ni a; Stand Up India hnuaiah loan mi 41 hnenah cheng nuai 920 pek a ni thung.

Prime Minister Em­ployment Generation Programme (PMEGP) hnuai­ah loan mi 624 hnen­ah cheng vbc. 19.05 pek a ni a; mi 70 hnenah education loan cheng nuai 176 pek a ni bawk.