National Deworming Day hmang

Mizoram pumah nimin aṭang khan Natio­nal Deworming Day hman a ni a, Aizawlah chuan St. Paul's Higher Secondary School auditorium-ah Health minister Lal Thanzara'n a hawng. Day thupui chu 'Naupang rúlhût pai lote hi naupang hrisel an ni' tih a ni.

Health Minister chuan hrisel pawimawhzia sawiin, "Kawng dangah ṭhang nasa viau pawh ni ila, hriselna kan neih si loh chuan thil awmze nei a ni lo. Tuna naupang leh ṭhalaite an hrisel chuan Mizoram hma lam hun pawh a hrisel tihna a ni thei ang," a ti a; hriselna kawngah taksa invawn fai, ei leh in uluk leh insawizawite a pawimawh tih hre reng turin sikul naupangte a chah.

Taksa atana hrisel lohna tam tak thlen thei leh naupang ṭhang laite ṭhan tiṭhu theitu rúlhût chu ngaihthah chi a ni lo tih sawiin Lal Thanzara chuan, "Rúlhût hi inkai awlsam tak a nih avangin, a thahna hlo ei a nih dawn pawhin chhungkuaah a ruala ei deuh kher hi damdawi lam thiamte duh dan a ni. Rulhut hlo hi rúlhût paite tana ei ngei chi a nih rualin, pai lo tura inuluk a pawimawh," a ti.

National Deworming Day hi sorkarin a ngaih pawi­mawh avangin kum khatah vawi hnih - Feb­ruary 10 leh August 10-ahte hman ṭhin a ni a; a ní bika naupang, sikul kal thei lote ei ve theih turin February leh August thlaah ni khat ve ve 'Hâwl kim vek ni' (Mop Up Day) buatsaih ṭhin a ni.