Bru lâk lêtna tura inbuatsaihna thlirho

August 9, Ningani khan Tripura-a Damcherra BDO office conference hall-ah Mizoram Home secretary Lalnunmawia Chuaungo hoin Ministry of Home Affairs, Tripura sorkar leh Mizoram sorkar aiawhte'n Bru lak lêt hna kalpuina tura inbuatsaihna hrang hrang an thlirho.

Meeting-a tarlan danin, Mizoram sorkarin Bru lak letna tura movement plan a siam angin kumin August 14 aṭanga September 30 chhungin Tripura relief camp paruka Mizoram mi Bru-te chu Mizorama hruai kîr hna thawh a ni dawn. Hruai kîr hna hlawhtling taka kalpui a nih theihna atan Tripura sorkar pawhin theihtawp a chhuah dawn a, kîr turte phurhna atan bus leh pick-up eng emaw zat ruahman a ni tawh.

August 14, 2018 aṭanga Bru hruai kîr hna kalpuina turah hian relief camp hrang hranga mipui aiawh leh Mizoram Bru Displaced People Forum (MBDPF) hruaitu, meeting-a telte chuan August 14-a ṭan tur chu harsatna hrang hrang avangin tihhlawhtlin theih a nih an rin loh thu an sawi a; an harsatna hrang hrangte chu hruai kîr hna thawh hmaa tihhlawhtlin an duh thu an sawi.

Meeting-ah hian Nobojoy camp-a chêngte chu recognised camp a nih loh avangin camp-a cheng mipuite chu enfiah (identify) theih an ni loh thu leh, hamṭhatna hrang hrangte pawh an dawn theih dawn loh thu tarlan a ni.