Mau chî supply tur zawnna Mi pakhat chiahin a chháng Mau chi supply nan cheng nuai 90 ruahman a ni
Mau/rua chi supply tura Horticulture department-in tender a koha chhànna lutte chu June 16, Thawhlehni leh nimin khan enfiah a ni. Tender hi mi pakhat chiahin a chháng a, a chhànna chu pawm tlakah ngaih a ni.
Horticulture department chuan, mau chi supply tur zawnna atan June 3, 2020 khan short tender notice a chhuah a, June 16 thleng thehluh theih niin, hun tiam chhungin mi pakhat chiahin chhànna a thehlut. Chhannate chu June 16 khan technical lam enfiah a ni a, nimin khan financial lam enfiah leh a ni bawk.
Tender chhànna hi Horticulture department chuan an department secretariat lamah an thawn a, Department Purchase Board-in an enfiah hnuah mau chi supply-tu tur chu thlan a ni ang.
Mau/rua chi supply tur hi chi hnih - Dendrocalamus Brandisii leh Dendrocalamus Latiflorus a ni a; tender chhannaah, mau/raw chi hnihte an supply theih zat tur tarlan a ni. A chî chu polypot-a dah tur a ni a, ft. 1 aiin a tàwi tur a ni lo. Supply-na atan hian cheng nuai 90 ruahman a ni.
Tarlan tawh angin, Horticulture department chuan thuchhuah siamin, mau chi supply-tu tur zawnna atana tender an chhuah chungchang an lo sawifiah tawh a, "Mau chi leina turin Covid-19 dona tur pawisa a tibuai lo," an ti.
Horticulture department tarlan danin, hripui léng karah pawh mau chíngtute'n kum an hloh lohna turin mau phun tur ngaihtuah a ngai a; a chíngtute hnenah mau chi pek a nih theih nan Finance department-in The Mizoram Public Procurement Rules, 2020 (Procurement of Goods, Works and Services) a siam angin tender chu sorkar phalnain koh a ni.
Model Bamboo Plantation atan hian SEDP Ieh National Bamboo Mission (NBM) pawisa converge (pawh kawp) a ni a, mau chi leina tur pawh hi NBM 2019-2020 sum aṭanga ruahman sa vek a nih avangin Covid-19 dona tura pawisa ruahman tihbuai a nei lo.