June thlaa a vawi khat nan Covid-19 vei hmuh belh lo

Zoram Medical College (ZMC) Covid-19 Laboratory-a June 16, Thawhlehnia swab sample 633 endik zingah Covid-19 hripui an awm lo a; hei hi June 1, 2020 hnua hripui vei hmuh chhuah loh ni hmasa ber a ni.

SRH-ZMC Covid-19 Bulletin nimin tlaia tihchhuahin a tarlan danin, Thawhlehnia sample endikte chu ZMC, Kolasib, Tlabung, Lawngtlai, Hnahthial leh Lunglei aṭanga sample an dawnte a ni a; nimin zing thlenga result hriat tawh 633 zingah hripui vei an awm lo.

Mizorama Covid-19 vei mek zat chu mi 120 a ni ta zel a, dam tawh pakhat nen vei tawh zat chu mi 121 an ni. Hripui vei mek zinga mi 47 chu State Referral Hospital (SRH)-ah enkawl mek an ni a, chu'ngte chu mipa 13 leh hmeichhia 34 niin, Aizawl district mi 31, Kolasib district mi 11, Saitual district mi pathum leh Serchhip leh Mamit district mi pakhat ve ve, kum 14-57 inkar an ni.

SRH-ZMC Bulletin tarlan danin Covid-19 vei tuna SRH-ZMC-a awm zingah ICU-ah mi pakhat leh Isolation Ward-ah mi 46 enkawl an ni a, "Isolation Ward-a awm mek 46 zingah khawsik nei pakhat a awm a, ngaihtuahawm a ni lo. Damlo dangte harsatna nei an awm lo a, ICU-a damlo awmin ngai a awh a ni," a ti.

Nimin khan hripui kai rinhlelh thilah mi pathum SRH-ah dah luh thar an ni a, Risk Ward-ah dah an ni. Covid-19 vei ni lo damlo mi 12 an awm mek bawk.

ZMC Covid-19 Laboratory-ah hian nimin khan mi eng emaw zatte swab sample endik leh a ni a, vawiin zingah result tihchhuah a ni ang.