Skywalk/ ropeway chhui ṭan a ni

Sakawrhmuituai tlanga skywalk leh Chaltlang-Durtlang inkara ropeway siam chungchanga MNF-te'n thubuai an thehluh chhui tura Lokayukta-in a ruat, Anti Corruption Bureau (ACB) chuan an chhui ṭan.

Skywalk leh ropeway chungchang chhui phalna hi December 7, 2021 khan Mizoram sorkara Vigilance department-ah thehluh a ni a; Vigilance department chuan a zir chian hnuah December 17, 2021 khan chhui phalna a tichhuak a, ACB chuan December 22-ah an dawng. ACB-in chhui phalna an dawn hnuah hunpui a inṭan chhoh chhunzawm avangin tun hnai khan an chhui ṭan a ni.

Skywalk leh ropeway chungchang hi eiruk thubuai a ni dawn a, chuvang chuan Prevention of Anti Corruption Act Section 17(A)-in a phût angin chhui phalna sorkarah lak hmasak a ngai ṭhin.

Tarlan tawh angin, MNF party-a Vigilance department leh Legal Board-te chuan November 22, 2021 khan skywalk leh ropeway siamnaah thil dik lo a awm nia ngaiin Lokayukta-ah complaint an thehlut a ni.

MNF-in complaint an thehluh chu Lokayukta chuan thu tlingah ngaiin thubuai an ziak lut a, an zir chian hnuah kalpui zel dan turah thutlukna an siam a ni. Lokayukta chuan thubuai hi a tìrah chuan Central Bureau of Investigation (CBI) chhuitir ngei turah ngai mah se, preliminary inquiry chu ACB kutah an dah.

CBI hnena thubuai chhui tura tih a nih loh chhan chu, Lokayukta-in a hmaa thubuai pahnih CBI chhuitir tura an tihah Mizoram sorkarin CBI koh luh phalna a pek loh avangin tun ṭumah pawh phalna pek a nih loh hlauhna avang te, complaint chu Mizo ṭawng veka tih a ni a, CBI tan buaithlakna chin a awm theih dawn avangte leh, thubuai thehluttute'n thil dik lo tia puh an neih loh vangte a ni.