Health Minister-in CMO pisa leh ANM School thar hawng
Health & Family Welfare minister Dr R Lalthangliana chuan nimin khan Mamit chief medical officer (CMO) pisa thar leh Auxiliary Nurse Midwife (ANM) School sak thar a hawng.
Dr R Lalthangliana chuan, Mamit district, Aspirational District hmasawnna leh tihchangtlunna turin sorkar laipui leh Mizoram sorkar aṭangin nasa taka thuam a nih thu sawiin, "Kan hmalakna avangin Aspirational District kan nih tirha 94-na kha dinhmun sang tak taka kan invawrh chho tawh a ni," a ti.
Health Minister chuan, thawktute hmalakna fakawm a tih thu sawiin, hna thawh ṭhat avanga sorkar laipui aṭanga ṭanpuina incentive award dawng thei tur leh district dangte entawntlak khawpa hma la turin a chah a; "Mamit district hi kan potential area-in a zir avangin hmasawnna tam takin min hmuak mek a ni," tiin, Bangladesh nena insumdawn tawnna tura hmalakna chhunzawm zel a nih dawn thu a sawi.
Dr R Lalthangliana chuan, damdawi-ina thawk doctor leh nurse-te chu an thiamna mai ni lo an ṭawngkam khat chauh pawh damlote damna a tling tih hre thar tura fuihin, "Kum hnih lai nunphung pangngaia nung thei loa min siamtu Covid-19 léngin min nuai leh mek a, hripui donaah thawhhona ṭha tak kan neih ang kha chhunzawm zelin sorkarin inkhuahkhirhna hrang hrang a duanahte fel tâwk lo leh ṭha tâwk lo tih kan nei a nih pawhin theihtawp kan chhuah tlan a ṭul a ni," a ti.
Mamit bawrhsap Dr Lalrozama pawhin thu sawiin, Aspirational District - Mamit district-in hmasawnna hmél a hmuhte chu lawmawm a tih thu a sawi. ANM School chu Ministry of Health & Family Welfare (Nursing Division) aṭanga sum hmuh cheng nuai 150 hmanga sak niin, contractor chu Zamzo Engineering Construction & Consultancy, Aizawl a ni a, square metre 102.90-a zau niin, December 3, 2021 khan sak zawh a ni.
Mamit CMO pisa thar chu State Priority Programme (SPP) 2018-19 sum nuai 250 hmanga sak niin, a satu chu Zamzo Engineering Construction & Consultancy an ni a; October 8, 2021 khan sak zawh a ni.