Mipuite'n dan an zawm ṭhat loh chuan Lockdown puan a ngai ang - Serchhip DC
Serchhip District Disaster Management Authority hotute chu nimin khan sàwm bikte nen DC meeting hall-ah an ṭhukhawm a; bawrhsap Kumar Abhishek chuan, mipuiin dan an zawm ṭhat loh chuan lockdown puan a ṭul tur thu a sawi.
Kumar Abhishek chuan, Serchhip district-ah ni tin swab test zat aṭanga Covid-19 punna rate chu 30% a tlin thu sawiin, "Aizawl district dawta case tamna ber kan ni mek. Tun ang renga kan pun chuan rei lo têah Aizawl district kan lehpêl dawn a ni. Heti taka hri kai kan pun chhan hi hunpui laia Covid-19 laka himna tur kan zawm ṭhat tâwk loh vang a ni ber," a ti.
An dinhmunin chhiat lam a pan zel loh nan mipuite'n himna tura inkaihhruaina ṭha taka an zawm a, khauh taka dan kenkawh a ṭul thu sawiin Serchhip DC chuan, "Kan himna tur dante mipuite'n kan zâwm ṭha thei ta lo a nih chuan hmalak dan awmchhun chu lockdown a nih mai hmel tawh a ni," a ti a, himna atana ruahmannate ṭha taka mipuiin an zawm a ṭul tak zet thu a sawi.
Ṭhutkhawmah hian, Serchhip khawpuia dawrte inhawn chhâwk ai chuan invennate khauh taka kengkawh chungin ni tin dan pangngaia inhawn ṭha zawkin an hria a; hei hi dawr inhawn chhâwkah dawr inhawng chhunah mipui an lut khawm nasa zawk nia bazar leh a chhehvel task force aiawhte leh sumdawng pawl aiawhten an hriat vang a ni.
Covid-19 laka nunphung dik zâwm ṭha lo dawrte chu chawlhkar hnih chhung khàrsak an rél a; dawr neitute chuan anmahni dawrtute'n mask ṭha taka hréng chung leh kut sil ngei chauhin indawrna an neihpui ṭhin tur a ni a, dawr neitu leh dawrtute'n inkaihhruaina an zawm leh zawm lohah dawr neitute'n mawh an phur dawn a ni.
Khawi hmunah pawh mipuite'n inkaihhruaina an zawm ṭhat theih nan incident commander-te chu nasa lehzuala hma la tura beisei an ni a; police-te chu ngaihhnathiamna tel loa dan kengkawh tura beisei an nih bakah, village task force-te chu an huam chhungah khauh taka hma la leh tura beisei an ni bawk.
Kohhrante chu Covid-19 nunphung zâwm ṭha tura beisei thar an ni a; mahnia inenkawl dam tum, swab test ti duh lo, inthup an awm nia sawi chungchangah, vanduaina leh harsatna khirhkhân zawk an tâwk nasa niin damdawi lama thawkte'n an sawi a ni.