Kum 15-18 tan Champhai-ah Covaxin pe ṭan

Champhai district-ah nimin khan kum 15-18 inkarte hnenah Covid-19 laka invenna damdawi (vaccine) Covaxin pek ṭan a ni.

Vaccine pek ṭanna hi Kahrawt community hall-ah additional DC Henry C Lalrawnkima'n a hawng a, healthcare worker, frontline worker, kum 60 chung lam leh natna benvawn neite hnena precaution dose pek tur a hawng nghal.

Henry C Lalrawnkima chuan, hripui vanga khawvel pum a buai mek laia hri insiam danglam a chhuah zel thu sawiin, "Hripui lèn ṭan aṭanga hun rei lo te chhungin vaccine siam chhuah a ni a, hei hian hri donaah awmzia thui tak a nei. Hripui vanga tawrhna leh thihna thleng tam zawk chu hri danna lak loh vang a ni," a ti a; Covid-19 kaihhnawiha hriat tur ṭulah mithiam zawkte thusawi ngai pawimawh fo tur leh thu belhchian dâwl lo ring lo turin mipui a chah.

Champhai district-ah hian kum 15-18 inkar mi 4,412 an awma chhût a ni a, nimin khan Champhai Kahrawt community hall, Kanan Veng community hall, Bethel Veng community hall, Hmunhmelṭha Primary School, Zote community hall, Tlangsam community hall, Ruantlanga Vanhnuailiana Hall, Bulfekzawl community hall, Hruaikawn community hall leh New Hruaikawn community hall-ahte vaccine pek a ni.

Healthcare worker, frontline worker, kum 60 chung lam leh natna benvawn neite hnena kar leh aṭangin precaution dose pek a ni ang.