Dec. 2021-ah thisen Unit 2,601 pek a ni

December 2021 chhung khan Mizoramah thisen unit 2,601 pek a ni a, chu'ng zinga unit 2,511 chu pek bik nei loa a thlàwna pek niin, 96.54% a tling. Association for Voluntary Blood Donation (AVBD) chuan Krismas puala thisen pek an huaihawta thisen petu zawng zawng chungah an lawm thu an tarlang.

MSACS leh AVBD aṭanga thu dawn danin, Model Blood Bank, Civil Hospital, Aizawl bikah nikum December thla chhung khan thisen unit 1,333 pek niin, petute mipa 1,105 leh hmeichhia 228 an ni a; unit 1,333 zinga 1,253 chu voluntary-a pek a ni.

Synod Hospital Blood Bank chuan December thla chhung khan thisen unit 318 an dawng a, chu'ng zinga unit 290 chu blood donation camp aṭanga an hmuh niin, unit 28 chu mimalin blood bank-a an pek a ni. Kolasib District Hospital-ah pawh December 1-23, 2021 chhung khan Krismas pualin thisen unit 107 pek a ni bawk.

AVBD chuan, Krismas puala thisen pek an huaihawta thisen petu zawng zawng chungah lawmthu sawiin, "December 2021 chhung khan blood bank pangaah phei chuan thisen pek zawng zawng (100%) a thlàwna pek a ni a, December hi nikum chhunga a thlawna thisen pek san ber thla a ni. Mi dangte tana sum leh pai bakah, thisen hlu tak sénga Krismas hmangtute an fakawm tak zet a, Krismas hman dan ṭha tak a ni," an ti.