KHAWTHLIR

DGP thar
Ministry of Home Affairs chuan nimin khan thupek tichhuakin, Mizoram director general of police (DGP) ni lai SBK Singh chu Delhi-ah a sawn a, Mizoram DGP thar turin Devesh Chandra Srivastava, IPS, AGMUT : 1995 a ruat nghal. Devesh Chandra Srivastava hi Delhi-a Economic Offences Wing leh Crime Branch-a special police commissioner ni lai a ni.

INTACH leh CM
INTACH, Mizoram Chapter hruaitute chuan nimin khan chief minister Zoramthanga chu a pisaah an kawm a, Aizawl Bawrhsap Pisapui kâng chungchang an sawipui. Bawrhsap pisa chu a ngai ang chiaha sak ṭhat leh ngei ni se an duh thu an thlen a; Chief Minister chuan INTACH rawtna chu Cabinet member-te sawipui a tum thu a lo hrilh.

Pipe phûm dawn
SIPMIU chuan January 14, 2022 aṭangin zing dar 9 leh tlai dar 5 inkarah Vaivakawna Hunthar Veng péng leh Zohnuai inkarah pipe an phûm dawn a, hna thawh zawh hma chu kawngpui chanve khàr a ni dawn. Traffic SP Rodingliana Chawngthu chuan, hnathawh tibuai thei tura kawngpui sira lirthei leh bungraw dah phal a nih loh thu a puang a ni.

Ráltlân tanpuina
MZP General Headquarters chuan, Mizo Church of Iowa, USA aṭanga Mizorama Myanmar ráltlânte ṭanpuina tur Rs. 1,49,200 an dawn chu nimin khan an sem a; ṭanpuina buhfai, alu, dailuah leh artuite chu Synod Camping Center, Neihbawih leh Sport Hostel, Mualpuia ráltlân khawsate hnenah an hlàn a, Mizoram hmun hrang hrangah sem chhunzawm zel an tum a ni.