Post Matric Scholarship pe kim tawh

Post Matric Scho­larship 2020-2021 diltu zirlai 33,798 hnenah Mizoram Scholarship Board (MSB) chuan pawisa a pe kim tawh. Hetih lai hian, zirlaite bank account-a pawisa la lut lo a awm nual.

MSB hotute chuan Vanglaini palai zawhna chhangin, tribal scho­larship diltute hnenah pawisa pek loh an neih tawh loh thu an sawi rualin, "Pawisa kan thun tawh si, an bank account-a la lut lo an awm a, kan buaipui mek. Aadhaar card base-a scholarship lutte a awm nual a, a ṭhen chu an scholarship dilnaa an Aadhaar card thlun zawmna ni lo bank account thehlut, an Aadhaar card thlun zawmna account zawka pawisa lutte an awm," an ti a; zirlaite chu an Aadhaar card nena thlun zawm bank account enfiah tura an hrilh ṭhin thu an sawi.

Scholarship pawisa lut nawnte chu bank kaltlangin an ṭhíng lêt a, pawisa la chhuak hman tawhte chu an chhinchhiah zel tih sawiin MSB hotute chuan, "Pawisa la chhuak hmante chu Post Matric Scholarship 2021-2022-ah pawisa kan pe lo ang, an ring tlang nghal dawn a ni," an ti.