Covid-19 veite enkawl turin inpe

Covid-19 veite en­kawl tur leh a ṭul apiang a thlàwna thawk tura inpe an awm belh zel. Health department pawh­in Covid-19 donaa tlawmngaia inpe duhte tan inhriattirna tur a tichhuak.

June 16, Thawhlehni khan C Lalropuii d/o C Lalthangkima, Khawzawl Electric Veng chu a inpe a; ani hi General Nursing & Midwifery (nursing) zir chhuak leh Singapore-a kum hnih chhung thawk tawh a ni.

C Lalngaizuali d/o C. Lalramnghakhlela, Lawngtlai Council Veng leh Lawmsangzuali d/o C Lalkunga, Lungtian, Lawngtlai district-te pawh Covid-19 donaa damdawi lam mite pui turin a inpe. Lawmsangzuali hi nursing zir zo tawh,

Aizawla damdawi-in pakhata thawk lai a ni a, a hna kalsanin Lawngtlai district-a a thlawna thawk turin June 16 khan a inpe a ni. C Lalngaizuali erawh chu medical lama thiamna bik nei lo, zirna pangngaia master degree zo tawh a ni thung.

K Lalremmawii d/o Lalngaihzuala, Armed Veng pawh Covid-19 dona leh hripui veite enkawlnaa thawk turin a inpe a, amah hi laboratory technician a ni.

Jessica Lalremruati (24) d/o R Lalchhuanawma, Serchhip P&E Veng pawh Serchhip medical team pui turin a inpe. Amah hi B.Sc. (MLT) niin, Lungleia private laboratory-a thawk mek a ni a, a hna bànsanin Covid-19 buaipuitu medical team pui turin a inpe a ni.

Hetih lai hian, Co­vid-19 dona leh hripui veite enkawlnaa a thlàwna thawk tura inpe an awm tâk zel avangin Health department chuan tlawmngaia inpe duhte tan inhriattirna tur a ruahman.

Inpe duh tan email - mzcvolunteers@gmail.com ah emaw, Covid-19 Helpline no. 102 (toll free) leh 0389-232336 / 2318336-ahte inhriattir theih a ni. Tlawmngaia inpete chu a ṭul dan azirin an thawh tur ruahman a nih tur thu an tarlang.