Kalphung thar kan thupui a ni reng - ZPM Working President

ZPM working president K Sap­danga chuan, kalphung thar chu an thupui a ni reng tih sawiin, "Kalphung thar chu unit aṭanga ram rorelna Assembly House thlenga Pathian hriatpui tlak politics hi a ni," a ti.

ZPM zawm tharte nimina an party pisaa lawm luhna inkhawmah K Sapdanga chuan, Mizorama sorkarna chelh tawhte'n dik tâwk loa hna thawkin ram an kaihruai tawh a ni thei tih sawiin, "Kalphung thar tiam tur pawh an nei ve lem lo. Keini erawh chuan kalphung thar kan tiam a ni," a ti a; kalphung thar sorkar tuak nan hmanraw chi hrang hrang an nei tih a sawi.

ZPM Working President chuan, ei leh bara intodelhah te, ram chhung inkalpawhna kawngpui leh ram dang nena inkalpawhnaah te, ṭhalaite thawh tur hna siamsakah te, kawlphethaah te, chhungkaw tin eizawnna ruahman kawngah te, hriselna kawngah te, zirna kawngahte leh a ṭha lam kawng tinrengah kalphung thar tur hmanrua an nei tih a sawi a ni.

Mizoram chu India ram state zingah a hnufual ber pawl a la ni reng tih sawiin Sapdanga chuan, "Ram rorelna ṭhat loh vang a ni tih mi tinin kan hria. Kan ning tawh a, sorkar kalphung thar kan nghâkhlel tlang hle. Pathian duh zawng leh lawm tlak hmangin ram rawng bàwl kan tum a, mite rin leh zui tlaka kan nun a ngai a, malsawmna petu kan lama a ṭan theih nan a malsawm tlaka kan awm a ngai a ni," a ti.

ZPM Working President chuan MLA inthlanpui lo awm tur chu political party-te ai mahin neutral mipuite'n an nghakhlel zawk tih sawiin, "Hetiang boruak a awm hi chuan sorkar a inthlak nge nge ṭhin.

ZPM-in hnehna kan chan theih dan chu mipuite rinkaia kan awmin a ni," a ti a, sorkar chet chhiatna au chhuahpui taimak viau ai chuan kalphung thar lantir a pawimawh zawk thu a sawi.

Rorelna ṭha an tuak thu sawiin K Sapdanga chuan, "Kan tuak dan chu Pathian hriatpui tlak a nih a ngai, malsawmna kan beisei a nih chuan, malsawmtu duhzawng kan ngai pawimawh tur a ni. Thinlung hretu Pathian mit hmuhah politics kan khel tih i theihnghilh lo ang u. Puithiam rual uap party awmchhun kan nih hi," a ti.

Inkhawm hi ZPM leader Lalduh­oma'n a kaihruai a; ZPM zawm thar an lawm luhte chu mi pariat an ni a, an zingah MNF tana rammu Capt. Lalthlana Sailo leh mi dang an tel tih ZPM thuchhuahin a tarlang.