January 2022-ah hripui vei 4,380 hmu tawh

January 9, Pathianni khan Mizoramah Covid-19 vei mi 518 hmuh chhuah a ni a, January thla chhungin mi 4,380 hmuh an ni tawh. Nimin khan hripui vei dam tawh mi 214 chhuahtir an ni a, hripui vanga thi an awm lo.

Covid-19 vei January 9-a hmuh thar mi 518-te chu mipa 210 leh hmeichhia 308 an ni a; TrueNAT hmanga hmuh chhuah pahnih leh RAT hmang hmuh 516 an ni. Positivity rate chu 19.23% a ni a, symptom nei 451 leh nei lo 67 an ni. ZMC laboratory-ah leh Fluorescent Immunoassay hmangin swab sample endik a ni lo.

Hripui vei hmuh tam zualna khuate chu - Champhai district-a Vangchhiaah 155, Bungzungah 18, Selàmah 17 leh Champhai Vengthlangah 15 niin, symptom nei vek an ni a; Selesih, Aizawlah 17 awmin, symptom nei vek an ni. Mamit district-a Darlungah 34 leh Chungtlangah 22, symptom nei vek an ni a, Lallenah mi 16 an awm. Ngharchhipah mi 25 leh Mualphengah mi 18, symptom nei vek an ni bawk.

Pathiannia sample endikna district 10 zingah positivity percentage 10% aia a sànna district paruk a awm a, a sànna ber Lawngtlai district-ah 100% a ni. Positivity rate 10% chung lam district dangte chu Champhai 28.95%, Aizawl 28.20%, Hnahthial 23.13%, Mamit 20.30% leh Lunglei 11.11% a ni a; Khawzawl district-ah sample endik a awm lo.

Nimin tlai dar 5 thleng khan hripui vei dam tawh mi 214 chhuahtir an ni a; district tina chhuak zat chu Aizawlah 109, Mamitah 24, Champhaiah 22, Lungleiah 20, Serchhipah 15, Lawngtlaiah 13, Kolasib-ah pakua, Saitual leh Hnahthialah pakhat ve ve a ni.

IDSP record angin, Mizoramah Covid-19 vei 1,46,045 hmuh chhuah a ni tawh a, mipa 70,170 leh hmeichhia 75,875 an ni. Nimin tlai dar 5 thleng khan mi 1,41,086 (96.60%) chhuahtir an ni tawh a, mi 561 (0.38%) thi tawhin, enkawl mek mi 4,398 (3.02%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,46,045 chu mi 1,000 zelah hripui vei mi 133 an awm ang a ni a; mi 1,00,000 zela Covid-19 vangin mi 51 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 9, 2021 thlenga swab sample endik tawh 15,40,834 aṭanga RT-PCR hmanga endik zat percentage chu 21.54 a ni a, RAT hmanga endik zat chu 72.64% a tling.