Lunglei district-ah restricted area 5 awm

Nimin khan Lunglei DC conference hall-ah bawrhsap Kulothungan A kaihhruaiin sorkar hotute, YMA Sub-Hqrs leh village task force hruaitute an ṭhukhawm a; Lunglei district-ah hian hri hluarna bik hmun panga awm mekin hripui darh zel tur chhu chat tura hmalak an rel.

Lunglei district-a hri hluarna restricted area-a puan mek khua/veng pangate chu College Veng, Lunglawn, Zotlang, Sekhum leh Thenhlumte a nih chu Bawrhsap chuan a sawi.

Lunglei Bawrhsap chuan, Covid-19 donaah sorkar department te, kohhran te, tlawmngai pawl te, khawtlang hruaitute leh mipui an ṭanrual a, theihtawp an chhuah tlàn zel a ṭul thu a sawi a; hripui laka invennate ngai pawimawh turin mipui a chah.

Lungleia Health department chhinchhiah danin, January 10, 2022 thlengin Lunglei district-ah swab sample 1,19,893 endik tawh niin, hripui vei 12,359 hmuh chhuah a ni tawh a, positivity rate chu 10.31% a ni. Covid-19 vei hmuh tawh mi 12,359 zinga 12,050 chu an chhuak tawh a, recovery rate chu 97.50% a ni. Covid-19 vangin mi 30 an thi tawh a, mipa 23 leh hmeichhia pasarih an ni a; Lunglei district mi State Referral Hospital-a enkawl tawh mi 50 an awm a, mi pathum enkawl mek an ni.