Lawngtlaiah naupang himna sawiho

Lawngtlai additional DC James Miahlung kaihhruaiin nimin khan a pisaah sorkar hotute leh khawtlang hruaitute an ṭhukhawm a, Lawngtlai district-a naupangte himna leh hamṭhatna chungchang an sawiho.

Naupang châwmtu nei lo, mahnia khawlaia khawsa emaw, khawsakna in nei tho chunga chhun lama vâk rawlài mai mai emaw, chhungkuaa khawlaia khawsa emaw an awm leh awm loh zir chiang turin DCPO leh CDPO-te’n VC leh tlawmngai pawlte thawhpuiin hma lo la se, January 14, 2022 hmain report thehluh ni se, an ti. Zirchianna azirin hmalak zui turin an rél.

National Commission for Protection of Child Rights (NCPCR)-in kum 2020-a Standard Operating Procedure (SOP) 2.0 a tihchhuah angin, khawlaia naupang khawsate zawng chhuak a, chhan chhuahna leh enkawlna kawnga hma la zui turin Supreme Court-in state leh union territory-te a lo hriattir tawh a ni.

Ṭhutkhawmah hian, naupangte hamṭhatna atana hma latu pawl Every Infant Matters-te’n Lawngtlai district-a Covid-19 vanga thi chhungkuaah pawl 6-12 zirlai emaw, medical/engineering zirlai emaw an awm chuan anmahni chhawmdawl tura hmalak an inhuam thu an sawi a; chhawmdawlna dawng thei tur inzawng chhuak tura hma lak ni se, an ti. Chhawmdawlna dawng thei tur an awm chuan Every Infant Matters hian smartphone leisakin, data pack thunna tur Rs 2,500 leh kum khat chhung atan ration leh stationery an tumsak dawn a ni.