Agriculture lama hlawhtlinna lian zawk ; Hmu turin Mizoramin theihna a nei - Union Agriculture Minister

Union minister of state for Agriculture & Farmers' Welfare Krishna Raj-i chuan nimin khan Secretariat Conference Hall-ah chief secretary Arvind Ray leh Agriculture leh a kaihhnawih department pariat hotute a kâwm a; Agriculture hmalaknaah hlawhtlinna lian zawk hmu turin Mizoramin theihna a neih thu a sawi.

Krishna Raj chuan, Agriculture leh a kaihhnawiha Mizoram sorkar hmalaknate a hriat tawh ṭhin thu sawiin, "Agriculture hma­laknaah hlawhtlinna lian zawk hmu turin Mizoramin theihna a nei a, Horticulture hnuaia hmalakna aṭang phei chuan Mizoram hian organic state ni theih turin theihna lian tak a nei tih kawng tinrengah a chiang a ni," a ti.

Agriculture kaihhnawiha hmalakna hrang hrang zingah Animal husbandry hnuaia vawk vulhah te, Fisheries hnuaia hmalakna cage culture-ahte hmasawnna a awm thu sawiin, Krishna Raj chuan, "Agriculture & allied sector hnuaia hma­lakna dangahte pawh nasa zawka ṭan lak a ṭul a ni," a ti a; Mizoram sorkar hmalakna pawimawhte tichak lehzual turin kawng dap a nih tur thu a sawi.

Meeting-ah hian Union Minister sàwmna angin Agriculture (Crop Husbandry), Agriculture (RE), AH&Vety, Horticulture, Fisheries, Sericulture leh LRSWC depart­ment director ṭheuh leh Irrigation and Water Resources chief engineer leh Rural Development department hotute chu minute nga ṭheuh powerpoint presentation hmanga an hnathawhte sawina hun pek an ni a; an mamawhte an sawi nghal bawk.

Union Agriculture Minister hian vawiin chawhma dar 11:45 hian CMO conference hall-ah thuthar thehdarhtute a kawm dawn.