Library Day vawi 8-na lawm a ni

Mizoram State Library bultumin nimin khan Central Library-ah Librarian Day vawi 8-na lawm a ni a, Art & Culture secretary Sangdingliana'n a hmanpui. Day thupui chu 'A good book has no ending - knowledge for all' tih a ni.

Library Day puala inkhawm buatsaih hi Art & Culture director R Hmingthanzuala'n a kaihruai a; Sangdingliana chuan, internet hmanga thuziak thehdarh leh chhiar mai a awlsam tawh em em rualin, lehkhabu hlutna chu a la ngai reng tih sawiin, zirlai naupangte leh Librarian Day hmanga kalkhawmte chu lekhabu ṭha ngainá a, finna tam zawk hai chhuah nan library-te tlawh uar zel turin a fuih.

Inkhawmah hian Synod Hospital librarian Dr Lal­biaksanga Hnamte-in 'Library hmasawnna atana pawmawh' tih thupui a sawi a, state librarian Lalramliana'n library lama Mizoam dinhmun a sawi thung.

Library Day hmannaa tarlan danin, Mizorama public library hmasa ber anga neih chu Sub-Divisional Library niin, kum 1969-ah Sikul­puikawnah din a ni a, Mizoram State Library, State Central Library tia hriat bawk chu kum 1974-ah din a ni.

Raja Ram Mohan Roy Library Foundation nena ṭangkawpin State Library building sak a ni a, March 22, 2011-ah hawn a ni. National Mission on Libraries (NML), Ministry of Culture, Govt. of India ṭanpuinain State Library Extension building sak zawh leh tawh a ni bawk.