MIMER infrastructure MNF-te sorkar din a ni - MLA Lalruatkima

MNF general secretary Lal­ruatkima, MLA chuan, Mizoram Institute of Medical Education and Research (MIMER) dinna atana infrastructure zawng zawng chu MNF din deuh vek niin a sawi.

Lalruatkima hian nimina Mizo Hnam Runa inkhawmah thu sawiin, MIMER din a nih theihna turin MNF-in sûlhnu tam tak a hnutchhiah niin a sawi a, "MIMER din a nih theih nana infrastructure zawng zawng hi MNF hun laia din deuh vek kha a ni. Gate lian tak an siam bâk saw Congress sorkar hian building 10 pawh MIMER atan hian an sa lo, an sa a nih chuan sawi rawh se," a ti.

MIMER din a nih theih nan hian sorkar laipui aṭangin cheng vbc. 138.18 hmuh a nih bakah NEDP aṭangin vbc. 20 dah a ni tih sawiin Lalruatkima chuan, "MIMER atana sorkar sum hmuh hi a tam hle a, tender chuah loin an duhsak zawngte hna an pe a ni," a ti a; chutih laiin, MNF sorkarin cheng vbc. 40 a hmuh hmangin hna an thawk nasa zawk niin a sawi.

Lalruatkima chuan, nausên thi tihtlem a nih theihna tura hmalak nan IMR sum hmangin kum 2014-ah motor lian panga lei a nia sawiin, "NHM aṭangin Civil Hospital, Aizawl chuan blood collection & transportation van ni 20.11.2017 khan a tithleng tawh a, heng motor hian MC Act-in a phût ang a neih theih loh avangin vawiin thlengin registration a la tihfel theih loh a, eng vangin nge motor registration tih theih loh leh heng motor hi khawiah nge a awm tih min hrilh turin sorkar kan phût a ni," a ti.

MNF MLA chuan, mipuiin syringe leh lapua thlenga an lei laiin, Congress sorkarin Health Department chu sum siam nan a hmang nasa hle niin a sawi a, "MNF kan sorkar hunah nurse leh doctor indaih lohnate pawh hi awmze neiin kan siamṭha ang," a ti. sorkar laipuiin ration chini kg. khatah Rs. 18.50-a a subsidised theih reng laia Congress sorkarin ration chini a titawp chu pawi an tih thu a sawi bawk.