Hnahthialah NH-54 kawngpui a min

Hnahthial Kanaan Venga NH-54 kawngpui, metre 50 vela thui tlahniam tawh chu August 12, Pathianni zan khan a chim a, lirthei tlan tlang theih a ni lo.

Hnahthial aṭanga thu dawn danin, Hnahthiala NH-54 kawngpui minna lai hi June 11, 2018 khan a tlahniam tawh a, hei vang hian lirthei lian chite chu tlan tlang thei loin, kawng dangah an hêl ṭhin a ni.

Kawngpui hi Mizoram chhim lam châk lâkna kawngpui pawimawh a nih avangin Hnahthial SDO (Civil) H Lalramliana chuan August 12, Pathianni khan geologist-te a endiktír a; geologist-te chuan, lei nghet leh nghet lo inzawmna lai a nih avangin lei chu a chê niin an sawi.

Kawng min ze tur venna atan a thlang lamah retaining wall leh check dam siam turin ruahmanna siam a ni a, chuta tan chuan Rs. 30,79,600 man project siam niin, project chu Hnahthial SDO(C) leh PWD (Highway) Sub-Division-VII, Hnahthial ten Disaster Management & Rehabilitation department-ah an thehlut tawh a ni.