KHAWTHLIR

DGP-in kâwm
DGP Balaji Srivashtava chuan nimin khan Aizawl SP conference hall-ah Independence Day lawmna, Aizawla neih tura parade contingent tur Tripura State Rifles-te a kâwm. Tun hnai aṭang khan hmarchhak state police-te chu national day lawmna an inhmanpui tawn ṭhin a, Mizoram police-te pawh kumin hian Tripura-a I-Day lawmnaah an tel dawn a ni.

NCC sawiho
1s1. Mizo NCC commanding officer Col. KS Dhindsa chuan nimin khan chief minister Lal Thanhawla a pisaah an kâwm. Tun dinhmunah Mizoramah NCC cadet 5,200 vel an awm mek a, tihpun zel dan tur leh hmalak zel tumna kawnga thil pawimawhte CM leh NCC hotupa hian an sawi dun a ni.

Mibo ruang hmu
August 2, 2018 zan aṭanga chin hriat loh, Lalṭhachama (26) s/o Lalngilneia, Bilkhawthlir Kawnveng chu nimin chawhnu dar 3 vel khan Bairabi Kawnveng thlanmual thlang mualah thia hmuh a ni. Lalṭhachama hi August 4 chawhnu lam aṭangin Bilkhawthlir Kawnveng Branch YMA-in an zawng ṭan a, August 6 aṭangin khawtlang huapa zawn a ni a, khawtlang huapa zawn chu August 10-ah tihtawp a ni. Chumi hnuah pawh chhungkhat laina leh mi tlawmngaite'n an zawng zel a, nimin tlai dar 3 vel khan thiin an hmu ta a ni.

Mipui hrilhfiah
Swachh Survekshan Grameen (SSG) 2018 atana hmalakna kal zelah nimin khan thil pawimawh hrang hrang inhrilhfiahna hun East Lungdar-ah buatsaih a ni. Swachh Survekshan Grameen atana hmalak tawhna te, hmachhawpte leh faina inelna atana tehfung hrang hrangte mipui hrilhfiah an ni.

Current man thi
Lalrinhlua (18) s/o Tharzuala, Hnahthial Venglai chu nimin chhun dar 12:30 vel khan electric bana a làwn laiin electric current-in a man a, Hnahthial damdawi-in panpui a nih hnuah a hliam tuar loin chawhnu dar 1 velah a thi. Hnahthial aṭanga thu dawn danin, Lalrinhlua hi FSJ Electricals-a thawk a ni a, FSJ Electricals hi Hnahthiala LT line siam hna thawktu an ni.