Party pakhata kal turin kan inbuatsaih - Lalduhoma
Zoram Peoples' Movement (ZPM) chief ministerial candidate Lalduhoma chuan, ZPM chu party pakhat anga kal zel turin an inbuatsaih mek tih a sawi a, Block tinah Constituency Development Committee din a ni dawn tih a sawi bawk.
Nimina ZPM pisaa inkhawmah thu sawiin Lalduhoma chuan, Assembly inthlan hunah ZPM chu symbol pakhat hmang turin hma an la mek tih a sawi a, "Tunah chuan movement angin kan kal a, party pakhat anga kal zel turin kan inbuatsaih mek, kan inṭhendarh dawn lo. ZPM hi Zoram mipui nghahfak kan ni a, eng pawh tâwk mah ila, inthlan zawhah pawh pawl pakhat angin kan kal zel dawn. MLA inthlanpui atan bial tlemtê tih chauh loah chuan candidate tur bial viltu kan tifel mek zel a ni," a ti.
Lalduhoma chuan thuneihna sem zâi (decentralisation) chungchangah sawiin, "Khawpui lian deuhahte municipality leh board a ṭul angin dah a ni ang a, India Danpuiin min phalsak angin, kan hnam zia leh nunphung leh tuna V/C kan neih lai zûlzuia her remin, a hming pawh kan duh anga vuahin hman tum a ni ang,” a ti a; local council leh village council-te kutah thuneihna sang zawk pek an tum thu te, LC/VC tinah Local Development Committee din a nih tur thute a sawi.
Assembly constituency tinah Development Block dah tum a nih thu sawiin Lalduhoma chuan, "Block tinah Constituency Development Committee din a ni dawn a, bialtu MLA chu chairman a ni ang a, BDO chu secretary a ni ang. A huam chhunga LC chairman leh secretary te, VC president leh secretary te, prominent citizen-te leh NGO hrang hrang aiawhte member an ni ang. Hei hi khua/veng tinte'n an mamawh an thlenna a ni ang," a ti.
ZPM CM Candidate chuan, grass root level planning tihpuitlin a nih theih nan budget-ah a hranpain constituency budget tur dah an tum thu te, MLA-te chu an bial mipui dâwr theih turin an bial chhungah a tam thei ang ber awm tura phût an nih dawn thu te, department tinin an bial chhunga hmalakna copy-te chu MLA-te an pek zel a ngaih dawn thu te, MLA-te chuan ruling leh opposition thlei hrang loin an bial chhunga sorkar hmalakna an vil tur thute a sawi bawk.