Faina lama hmalakna sawiho

Lunglei District Water and Sanitation Committee chu nimin khan an chairman Dr Ankita Chakravarty, district bawrhsap hoin DC conference hall-ah an ṭhu a; Lunglei district-a Swachh Bharat Mission (Gramin) hmalakna, kum 2017-18 chhunga kalpui dan an thlirlet bakah, kum 2018-19 chhunga Swachh Survekshan Grameen 2018 kalpui dan tur an sawiho.

Dr Ankita Chakravarty chuan, kawng tinrenga hmasawn turin faina leh thianghlimna a pawimawh thu sawiin, "Kan district hi ualau taka zun leh êk thiar kawnga district fihlim - open defecation free (ODF) a nih ve thuai theihna tura theihtawp chhuah ṭheuh a ngai," a ti a; Lunglei district chhunga êk-in sak tawhte ṭha tak leh felfai taka enkawl zui zel turin mipui a chah.

PHE executive engineer Alla Lalṭhalura tarlan danin, Lunglei district hi ODF-a puan a nih theihna atan hmalak mek a ni. SBM(G) kalpui a nih hnuah chhungkaw 13,257 (Lunglei RD Block-ah 1,376, Hnahthial Block-ah 598, Lungsen Block-ah 4,133 leh Bunghmun Block-ah 7,150)-te tan ek-in sak a ni tawh a; Swachh Bharat Kosh hnuaiah ek-in 1,747 siamṭhat a ni tawh bawk.

Meeting-ah hian, Lunglei RD Block leh Hnahthial RD Block chhungah District Level ODF Verification neih thuai ni se an ti a; enfiahna kalpui turin District Level Verification Team din an rêl a ni.