Chhimtuipui kual khung district thláwp lo

South Vanlaiphai, Darzo, Muallianpui, Lungpuitlang leh South Lungleng khuaa tlawmngai pawl hrang hrang hruaitute inhmu khawm chuan, Chhimtuipui kual khunga district dilna an pawm lo tih an puang.

Lunglei district khaw­chhak lama khaw pangaa khawtlang hruaitute hi nimin khan South Vanlaiphaia Rural Development Rest House-ah an ṭhukhawm a; khaw panga aṭang hian V/C-te leh NGO aiawhte telin, mi 40 chuang an kal khawm a ni.

Kal khawmte chuan, Sangau sub-headquarters Young Lai Association (YLA), Bualpui NG YLA sub-hqrs. leh South Vanlaiphai Group YMA-te'n an din Phawngpui Area Coordination Committee (PACC)-in August 6, 2018-a Chhimtuipui kual khung chhung tan district dil ni se, an tih chu an hriatpui loh thu leh pawmpui loh thu an tarlang a; "Hnahthial district nawrna leh hmalakna kan pawmpui a, hei hi a tâwkah kan ngai," an ti.

Tarlan tawh angin, YLA sub-headquarters office, Sangaua August 6, 2018-a meeting chuan PACC an din a, Chhimtuipui kualkhung chhung - Sangau area, South Vanlaiphai area leh Bualpui NG area huamin district siam an duh thu an puang a ni. An tarlan danin, PACC district demand area-ah hianmi 40,000 dáwn an chêng a ni.