Khung hran mek mi 8,890 an awm

Mizoram chhunga quarantine facility hrang hrangah June 16, Nilaini thleng khan mi 13,916 awm tawhin, chu'ng zinga mi 8,890 chu an la awm mek a; June 16 bikah khan mi 189 chu inkhung hran hun zoin an chhuak.

Tarlan tawh angin, Mizoram sorkar chuan a tirah chuan ni 14 chhung inkhung hran hun atan a ruahman a, mahse, June 8 aṭang khan quarantine hun ni 14 chu ni 21-ah tihsei a ni.

 Task Group on Quarantine Facilities report-a a lan danin, Mizorama quarantine facility hrang hrangah mi 17,018 an awm thei a, June 16 thleng khan quarantine facility-a khung hran leh mahni ina khung hran mi 13,916 an awm tawh a, chu'ng zinga mi 4,876 chu chhuak tawhin, mi 8,890 an la awm mek a ni.

Sorkar thuchhuah tarlan danin, June 16 bikah chuan khung hran thar mi 156 an awm a, chutih laiin, mi 189 an chhuak thung a, isolation facility-a sawn mi pathum an awm bawk. Isolation centre-a sawn tawh zawng zawng chu mi 150 an ni. 

June 16 , Thawhlehni thlenga khung hran mek zat chu sorkar quarantine facility (QF)-ah mi 4,463, isolation facility-ah mi 1,114, community quarantine facility (CQF)-ah mi 3,298, mahni in (home quarantine)-ah mi 968 leh hotel/paid quarantine mi 47 an ni.

Sorkar thuchhuah tarlan danin, community quarantine faci­lity (kohhran hrang hrangte hmun) hi Mizoram pumah 194 a awm a; kohhran hrang hranga CQF awm zat chu - Presbyterian Kohhran 121, Baptist Kohhran 40, Salvation Army 16, Lairam Isua Krista Baptist Kohhran 10, Evangelical Church of Maraland 2, UPC (NEI) 3 leh UPC Mizoram) 2-te a ni. Sorkar thuchhuahin a tarlanah Seventh Day Adven­tist (SDA) hmunhma a lang tel lo a; chutih laiin, SDA hmunhma hman tel a awm nia thu dawn a ni.

CQF hi Aizawl district-ah 124, Lunglei district-ah 21, Siaha district-ah 10, Champhai district-ah 15, Ser­chhip district-ah pathum, Lawngtlai district-ah pakua, Mamit district-ah pasarih, Saitual district-ah pahnih leh Khawzawl district-ah pathum a awm a; Kolasib leh Hnahthial district-ah a awm lo thung.

A hmun    Mi awm    Jun 16-a    Dah luh    June 16-a    Chhuak    Isolation-a    Isolation-a    Tuna la

    thei zat    Dah thar    tawh zat    Chhuak    tawh zat    Sawn thar     Sawn    Awm mek

Sorkar QF    9,189    106    8,746    120    4,159    2    124    4,463

Isolation    -    14    430    0    316    0    0    1,114

CQF    7,760    24    3,687    68    363    1    26    3,298

Home    -    12    999    0    31    0    0    968

Hotel/paid    69    0    54    1    7    0    0    47

TOTAL    17,018    156    13,916    189    4,876    3    150    8,890