Thisen pek kawnga NSS-te inel nan Sports Minister Trophy siam tum a ni
State Level National Service Scheme (NSS) Advisory chu nimin khan Sports & Youth Services (SYS) minister Robert Romawia Royte hoin a pisaah an ṭhukhawm a, hmalak dan tur an rél. Minister chuan, thisen pek kawnga NSS-te inelna atan lawmman - Sports Minister Trophy for Blood Donation siam tum a nih thu a puang.
Robert Romawia Royte chuan, infiamna lama hmasawnna bakah ṭhalaite hmakhua leh hmasawnna ngaihtuah chu SYS department mawhphurhna a nih thu sawiin, "Department chhungah pawh hun rei tak youth services lamin ngaihthah a hlawh a, tun aṭang chuan theihtawp chhuaha ṭan lak a ṭul," a ti a; Mizoram NSS-a thawktute leh zirna-in hrang hranga NSS programme officer-te leh volunteer-te hmalak dan leh hnathawh chu India ram huap pawha chhuan tlak a nih thu a sawi.
NSS-in Mizorama pawl hminga thisen pe ṭhinte zinga thisen pe tam ber nihna a kum záwna a la chu department tan pawh inchhuanna tur ṭha a nih thu sawiin SYS Minister chuan, "NSS volunteer-te'n mi dangte tana thisen pek an intihhmuh a, an uar zel theih nan 'Sports Minister Trophy for Blood Donation' siam tura rêl a ni. Higher secondary school level tan trophy leh Rs. 1,00,00 leh college & university tan trophy leh Rs. 1,00,000 lawmman siam ni se tih a ni," a ti.
State NSS officer Dr Zirlianngura tarlan danin, kum 2019 chhung khan NSS-te'n voluntary blood donation camp vawi 65 an buatsaih a, thisen unit 5,676 an pe. Thing ṭiak 2,910 an phun a, zun-in 12, public water point pariat, ṭhut chawlhna (waiting shed) pasarih, vantlang bual-in (public bathroom) pahnih leh vantlang hmunah ṭhutthleng (bench) pasarih an siam bawk.
NSS meeting-in an rèlte
NSS unit hrang hrangte tan action plan - thisen an pek zat tur, thing a phun tur zat, awareness programme chi hrang hrang an siam zat tur ruahman.
Kum 2020-21 aṭangin college pahnih - St. Xavier College, Lengpui leh Helen Lowry College, Aizawlahte NSS unit hawn.
Higher secondary school pathum - Suangpuilawn, Khawhai leh Sairang HSS-ahte NSS unit hawn.
State Level NSS Award chu NSS programme officer leh volunteer ti ṭha pakhat ve ve hnenah pek.
Kum 2020-21 chhunga NSS thupui (theme) atan 'Water and Conservation' an pawm.