Election official-te inthlan kaihhnawihah Mizoram páwna kal lo tura ngen an ni

NGO Coordination Committee (Joint NGO) hruaitute nimina Central YMA Committee Room-a ṭhukhawm chuan, Election official-te chu Mizoram páwnah inthlan kaihhnawiha kal lo turin an ngen.

Meeting kaihruaitu CYMA president Vanlalruata chuan, electoral roll ennawn chungchangah Joint NGO remtih loh leh duh dan ni loa thil tih a awm thu sawiin, "Electoral roll revision atana form-te Tripura-a Tuikuk camp-ah dah a ni. Chuvangin, engtin nge hma kan lak ang tih ngaihtuah a ngai a, chumi atan chuan meeting hi koh a ni," a ti.

Vanlalruata chuan, August 10, 2018-a Monitoring Committee on Bru Repatriation ṭhutkhawm ṭuma an thu sawite tarlangin, "Ministry of Home Affairs lam chu an khauh khawpin ka hria. Bru aiawhte chu an lêt emaw, let lo emaw, October 1, 2018 aṭanga camp khâr a nih tur thu an hrilh," a ti a; agreement siam tawh anga hruai kîr hna kalpui a nih tur thu MHA aiawhte'n an tarlan thu a sawi.

Bru-te thil phût thar chu MHA-in tihhlawhtlin an remti lo bur tih sawiin CYMA President chuan, "Agreement chhunga mi siam rem ngaite chu siam rem an remti. Siam rem ngaite pawh hruai kîr hna zawh hma chu siam rem an remti lo. Mizoram Bru-te thil phût pawh hruai kîr hna zawh hma chu an tihsak thei lo," a ti.

Report petu CYMA general secreatary Lalhmachhuana chuan, kum 2014 Lok Sabha thlan dawna Tripura relief camp-a vote thlak an remtih loh avanga Joint NGO-te'n total bandh an huaihawt ṭumin, Election Commission of India (ECI) chu tun hnu reng rengah Mizoram Bru, Mizoram páwna awmte Mizoram inthlanah (MP & MLA) Mizoram chhung ngeia vote an thlak theih nan ruahmanna siam tura an intiam thu a sawi.

Lalhmachhuana chuan, Mizoram Chief Electoral Officer (CEO) an hmuh ṭumin, ECI intiamnaah hian Mizoram páwna electoral roll ennawn a tel loh thua a lo chhan thu sawiin, "ECI hnuaia thawk an nih avanga ECI thupek chu zawm ngei an tum thu CEO hian a sawi a. Chuvangin, roll revision hi neih ngei an tum niin a lang," a ti.

Kum 2014-a total bandh an tihtawp chhan dang chu, 'Tuikuk, Mizoram mi leh sa dik tak koh kîr leh an nih pawha lo kîr leh duh lote chu Mizoram electoral roll aṭanga paih/thai bo an nih theih nan Mizoram sorkarin hma a la ang' tih a tel vang a nih thu sawiin Lalhmachhuana chuan, "Hemi kawngah hian Mizoram sorkar chuan hma a la chak lo hle a ni," a ti a; hemi chungchang hi January 27, 2015 khan Chief Minister an hrilh nawn thu a sawi.

Nimina Joint NGO ṭhukhawm chuan, kumina MLA inthlanpui awm tura inbuatsaihna kal mekah, inthlan kaihhnawih (election process) reng reng Mizoram páwna kalpui a remti ngai dawn lo tih an puang nawn a, "Election official-te pawh Mizoram páwna election kaihhnawiha chhuak lui lo turin kan ngen nawn leh a ni," an ti.