Tuichang bialah Rinliana Sailo

Nimina Khawzawl DC Rest House tuala Khawzawl Group Congress party worker intawhkhawmnaah Congress Leghislature Party treasurer Zodintluanga chuan, kumina Assembly inthlanpuiah Tuichâng bialah MLA ni lai Lalrinliana Sailo a din leh dawn thu a sawi. Lalrinliana Sailo pawhin, Tuichang biala a din leh tur thu chief minister Lal Thanhawla'n a puan tawh chu thu nung a nih thu a sawi.

Congress party aṭanga Tuichang biala candidate tur chungchang sawiin Zodintluanga chuan, "Kan Chief Minister zahawm takin a tih ngai loh angin, Pu Lalrinliana Sailo a rawn ding leh dawn tih a rawn puang tawh a ni," a ti a; party hotute duh dan chu zâwm turin party worker-te a chah.

Tuichang bialtu MLA Lalrinliana Sailo chuan a bial ngaiah a din leh tur thu a sawi a, "Tute'n emaw BJP-ah emaw, MNF-ah emaw a lut dawnte min lo ti a. February 18, 2017 khan kan CM zahawm takin he lai bialah a rawn ding leh ang, a ti a, chu chu thu nung a ni mai, a dang a awm lo," a ti.