Mizoram RKVY project vbc. 11.87 hû pawm a ni - Union Agriculture Minister

Mizoram tlawha rawn zin Union minister of state for Agriculture & Farmers Welfare Krishna Raj chuan, Mizoram sorkarin RKVY hnuaia project cheng vbc. 11.87 a siam chu pawm a nih thu a puang.

Krishna Raj-i hian nimin khan CMO conference hall-ah thuthar thehdarhtute a kâwm a; RKVY hnuaia Mizoram project-te pawm a nih thu sawiin, "Vawiinah hian RKVY hnuaia Mizoram sorkarin project a neihte pawm a nih thu ka puang a ni. RKVY hnuaia sum hmuh tur cheng vbc. 11.87 hi project 111 atana hman tur a ni a, sorkar laipuiin 90% tumin, Mizoram sorkarin 10% a tum ang," a ti.

Union Minister chuan, August 13, 2018 khan a department chan kaihhnawiha Mizo­ram sorkar official-te nen an inkawm thu sawiin, "An mamawhte ka ngaihthla a, secretary-te chu an mamawh neih angah project siam a, thehlut turin ka hrilh," a ti a; Mizoramin hma a sawn theihna atan theihtawp chhuah zel a tum thu a sawi.

Blue Revolution atan Mizoramin hmun­hma a neih ṭhat thu sawiin Krishna Raj chuan, "Sangha khawi theihna hmun in nei ṭha a, sum tam zawk in hmuh theihna atan Chief Minister leh official-te hnenah ruahmanna siam a, rawn thehlut turin ka hrilh," a ti.

Krishna Raj chuan, oil palm chîngtute an hlâwk zawk theih nan sorkar laipuiin ruahmanna a siam thu sawiin, "Mizoram sorkar pawh oil palm refinery hmun tur zawnga min rawn hriattir turin ka hrilh a ni," a ti a; sorkar laipuiin kut hnathawktute sum hai luh chu kum 2022-ah chuan a lêta tihpun a tum thu a sawi.

Mizoramin hma a sawn thu sawiin Union Minister chuan, "In Chief Minister kaihhruaina hnuaiah Mizoramin kawng hrang hrangin hma a sawn a, Mizorama lo neitu leh mipuiin hma an sawn theihna atan theihtawp kan chhuah zel ang. White, blue leh green revolution atan Mizoram hian theihna in nei vek a ni," a ti.

Krishna Raj ṭawiawmtu chief minister Lal Thanhawla chuan, Union Minister lo zin chu kut hnathawktute hmasawnna atan a ṭangkai dawn thu sawiin, "Official-te'n rawtna hrang hrang an siamte chu tihhlawhtlin ngei a tiam a ni," a ti a; Mizoramin agriculture leh horticulture lamah hma a sawn ngei a beisei thu a sawi.

Union Minister of State for Agriculture & Farmers Welfare hian nimin vek khan chief minister Lal Thanhawla a chenna banglaah a kâwm a; Ṭhuampuia MULCO Dairy Plant a tlawh bawk.