SSA-RMSA-a thawkte hlawh ngai pe dawn?

Congress party ṭhalai, MPYCC chuan nimin khan thuchhuah siamin, sorkar laipuiin RMSA leh SSA-a thawkte hlawh tihniam mah se, Mizoram sorkar chuan Mizorama SSA leh RMSA-a thawkte hlawh a tihniam ve dawn lo a, a ngai anga hlawh pek an nih dawn thu an tarlang a; lawmawm an tih thu an sawi.

MPYCC chuan, RMSA leh SSA-a thawk mi 3,452-te hlawh chu tun hnai­ah sorkar laipuiin nasa taka a tihhniam thu sawiin, "Chutiang chu ni mah se, sum leh pai indaih lohna karah Mizoram sorkarin an hlawh ngai ang pe tura thutlukna a siam hi ropui kan ti hle. Zirna ngai pawimawhtu chief minister Pu Lal Thanhawla, Finance minister Pu Lalsawta leh School Education minister Pu H Rohluna te ṭhahnemngaihna leh inpekna a ropui kan tiin kan chhuang tak zet a ni," an ti.

MPYCC tarlan danin, kumin 2018-ah sorkar laipuiin state Project Approval Board-te'n SSA leh RMSA-a thawkte hlawh tur pawisa an dil ang a pe lo a, ruahmanna aia hniam daih an pe a ni. Hei vang hian P/S zirtirtu Rs. 20,000 hlawh ṭhin chu Rs. 15000-ah, M/S zirtirtu Rs. 25,000 hlawh ṭhin chu Rs. 20,000-ah, H/S zirtirtu Rs. 27,000 hlawh ṭhin chu Rs. 25,000-ah leh part time zirtirtu Rs. 20,000 hlawh ṭhin chu Rs. 7,000-ahte tihhniam a ni.

Hetiang a ni chung hian Mizoram sorkar chuan zirna a ngaih pawimawh êm avangin SSA leh RMSA-a zirtirtute chu an hlawh pangngai ang pek a tum tih sawiin MPYCC chuan, "Thla tin cheng vbc. 2.26 leh kum khatah vbc. 27 chuang sên belh a ngai dawn a ni," an ti. Tuna Mizorama RMSA leh SSA hnuaia thawkte'n thla li chuang hlawh an lak theih loh chhan chu sorkar laipuia Project Approval Board (PAB) ṭhut tlai vang niin an sawi bawk.